ސްރީލަންކާގައި ޗައިނާއިން ހިންގާ ހަމްބަންޓޯޓާ ޕޯޓަށް ލެފި އާގުބޯޓަކުން ރޭޑިއޯއެކްޓިވް މާއްދާތަކެއް ފެނުމުން ބޯޓު ބަނދަރުން ބޭރުކޮށްލައިފިއެވެ. ޓެކްނިކަލް މައްސަލައެއް ޖެހިގެން، ސްރީލަންކާގެ ކަނޑުގެ ސިފައިންނާއި ކަސްޓަމްސްގެ ހުއްދައާއެކު ހަމްބަންޓޯޓާ ޕޯޓަށް އެމްވީ ބީބީސީ ނޭޕަލްސް އާގުބޯޓު ގާތް ކުރި އިރު އޭގައި ނިއުކްލިއަރ މާއްދާ ހިމެނޭ މުދާތަކެއް ހުރިކަމަށް ބުނެފައެއް ނުވެއެވެ. ނަމަވެސް ބޯޓު ބަލާ ފާސްކުރުމުން ނިއުކްލިއަރ މާއްދާ ފެނުމުން ސްރީލަންކާ އެޓޮމިކް އެނަރޖީ ރެގިއުލޭޓްރީ ކައުންސިލުން ވަނީ ބޯޓު ބަނދަރުން ބޭރުވުމަށް އަންގާފައެވެ.
މި އާގު ބޯޓަކީ ރޮޓެޑަމްއިން ޗައިނާއަށް ޔުރޭނިއަމް ހެކްސަފްލޮރައިޑްގެ ބާވަތްތަކެއް ހިފައިގެން ދަތުރުކުރަމުން ދިޔަ ބޯޓެކެވެ.
މި ހާރު މި ބޯޓު ވަނީ ބަނދަރުން ބޭރުގައި ނަގިލި އަޅާފައެވެ.
ހަމްބަންޓޯޓާ ޕޯޓަކީ ޗައިނާއިން 99 އަހަރަށް ހިންގަމުން ގެންދާ ލަންކާ ބަނދަރެކެވެ.
ލަންކާ ކަސްޓަމްސްއިން ބުނެފައި ވަނީ މި ބޯޓުން އެއްވެސް މުދަލަލެއް އެއްގަމަށް ބާލާފައި ނުވާ ކަމަށެވެ. ސްރީލަންކާއިން ވަނީ މި ބޯޓްގެ އެޖެންޓާ ދެކޮޅަށް ގާނޫނީ ފިޔަވަޅު އެޅުމަށް ނިންމާފައެވެ.
