އޮސްޓްރޭލިއާގެ ވިޔަފާރިއަށް ޗައިނާއިން ދަތިކުރަމުން ދިއުމާ ގުޅިގެން ޗައިނާގެ ބެލްޓް އެންޑް ރޯޑްއާ ގުޅޭ އެއްބަސްވުމެއް އޮސްޓްރޭލިއާއިން އުވާލައިފިއެވެ. ޗައިނާއިން ވަނީ މިފިޔަވަޅުގެ ސަބަބުން އޮސްޓްރޭލިއާއަށް ގެއްލުންތަކާ ކުރިމަތިލާން ޖެހޭނެ ކަމުގެ އިންޒާރު ދީފައެވެ.
ކޮވިޑް19 ތަހުގީގު ކުރުމަށް ކުރެވުނު މަޝްވަރާތަކާ ގުޅިގެން އޮސްޓްރޭލިއާއާއި ޗައިނާ ޚިޔާލު ތަފާތު ވުމުން ޗައިނާއިން ވަނީ އޮސްޓްރޭލިއާގެ ވިޔަފާރިއަށް ގެއްލުންވާ ގޮތަށް ދަތިކުރުމުގެ ފިޔަވަޅު އަޅާފައެވެ. އެގޮތުން އޮސްޓްރޭލިއާއިން އެތެރެކުރާ ވައިންއަށް 218 ޕަސެންޓްގެ އިމްޕޯޓް ޑިއުޓީއެއް ނެގުމަށް ނިންމިއެވެ. އަދި އޮސްޓްރޭލިއާގެ ލޮބްސްޓާ ނުގަތުމަށާއި އޮސްޓްރޭލިއާގެ ލަކުޑިއާއި ގެރިމަސް ނުގަތުމަށް ޗައިނާއިން ވަނީ ނިންމާފައެވެ.
އޮސްޓްރޭލިއާއިން ބެލްޓް އެންޑް ރޯޑްގެ މަޝްރޫއާ ގުޅޭ އެއްބަސްވުން އުވާލުމަށް ނިންމާފައި ވަނީ އޮސްޓްރޭލިއާއިން ދާދި ފަހުން ފާސްކޮށްފައިވާ ގާނޫނަކާ އަޅުވައެވެ.
އައު ގާނޫނުގައި އޮސްޓްރޭލިއާގެ ޚާރިޖީ ވަޒީރަށް ބާރު ދީފައި ވަނީ ގައުމީ މަސްލަހަތަށާއި އޮސްޓްރޭލިއާއާއެކު ގުޅުން ގާއިމޮށްފައިވާ ބޭރުގައުމެއްގެ ގުޅުމަށް ބުރޫ އަރާފަދަ އެއްވެސް އެއްބަސްވުމެއްގައި އޮސްޓްރޭލިއާގެ ސްޓޭޓަކުން ސޮއިކޮށްފިނަމަ، އެ އެއްބަސްވުމެއް އުވާލުމަށެވެ.
ޗައިނާއިން ބުނެފައި ވަނީ އޮސްޓްރޭލިއާގެ މިފިޔަވަޅުގެ ސަބަބުން ދެ ގައުމުގެ ގުޅުމަށް ބުރު އެރުންވެސް އެކަށީގެންވާ ކަމަށެވެ.
އޮސްޓްރޭލިއާގެ މުދަލަށް ޗައިނާއިން އެޅި ނޭއްގާނި ފިޔަވަޅުތަކުގެ ތެރޭގައި ޝެންހާއި އެއަރޕޯޓު މަގުން އެތެރެ ކުރަން އުޅުނު އޮސްޓްރޭލިއާގެ 2 މިލިއަން ޑޮލަރުގެ ލޮބްސްޓަރތައް ހަލާކުވީ ކަސްޓަމްސްގައި ހުރެ، ހުއްދަ ނުލިބިގެންނެވެ. އެއާއެކު ޗައިނާއިން އޮސްޓްރޭލިއައިން އަހަރަކު އެތެރެކުރާ 700 މިލިއަން ޑޮލަރުގެ ލޮބްސްޓަރ ވިޔަފާރިވެސް ވަނީ ނިމުމަކަށް އައިސްފައެވެ.
