ނެދަރލެންޑްގެ އެންމެ ބޮޑު މުވާސަލާތީ ވިއުގައިގައި ޗައިނާގެ ވާވޭ ކުންފުނިން ޖާސޫސް ކުރިކަން ބޭޒާރު ވެއްޖެއެވެ. ނެދަރލެންޑްގެ ކޭޕީއެން ކުންފުނީގެ ޚިދުމަތް ބޭނުން ކުރި މީހުންގެ ފޯނު ކޯލުތައް ވާވޭގެ މުވައްޒަފުން އަޑު އަހަމުން ދިޔަ ކަމަށާއި ފުލުހުންނާއި އިންޓެލިޖެންސް އެޖެންސީން ޓެޕްކޮށްފައި ހުރީ ކޮންކޮން ނަންބަރުތަކެއްކަންވެސް މި މީހުންނަށް އެނގޭ ކަމަށް ޑަޗް ދުވަހު ނޫހަކުން ރިޕޯޓް ކޮށްފިއެވެ. ޑި ވޯލްކްސްކްރާންޓް ނޫހުން މި ވާހަކަ ރިޕޯޓް ކޮށްފައި ވަނީ ކޭޕީއެން އިން ކޮންސަލްޓެންސީ ފާމެއް މެދުވެރިކޮށް އެކުލަވާލި ރިޕޯޓަކާ ހަވާލާދީއެވެ.
ކެޕްގެމިނީ ކޮންސަލްޓެންސީ ފާމުން ބުނި ގޮތުގައި ކޭޕީއެންގެ ސްޓާފުން ކުންފުންޏަށް އެނގުމަކާ ނުލައި 2010ގައި މީހުންގެ ފޯން ކޯލްތައް އަޑު އަހާކަން އެނގިގެން އެކަން ބެލުމަށް އެކުންފުންޏާ މަސައްކަތް ހަވާލު ކުރީ ކަމަށެވެ.
ޑަޗް ޕާލަމެންޓްގައި ވާހަކަ ދައްކަމުން މެންބަރުން ވަނީ ކޭޕީއެން ނެޓްވަރކްގައި ވާވޭގެ ދައުރާ ބެހޭ ގޮތުން ސަރުކާރުން ޖަވާބުދާރީ ވުމަށް ގޮވާލާފައެވެ.
ޑަޗް ޓެލެކޮމް އޮތޯރިޓީން ބުނެފައި ވަނީ، ވާވޭއިން ފޯން ކޯލުތައް އަޑު އެހި ކަމެއް ނުވަތަ މީހުންގެ ޑޭޓާ ވަގަށް ނެގިކަމެއް އެފަރާތަށް އެނގިފައި ނުވާ ކަމަށެވެ.
ކޭޕީއެން އިން ވަނީ މި ރިޕޯޓްގެ ސައްހަ ކަން ކަށަވަރުކޮށްދީފައެވެ. އަދި މިއީ ހައިރާން ކުރަނިވި ކަމެއްކަމެއް ބުނަމުން އެކުންފުނިން ބުނެފައި ވަނީ ކަމުގެ ބޮޑު މިނުން ރިޕޯޓް އަދިވެސް ވަނީ ސިއްރުކޮށްފައި ކަމަށެވެ.
ކޭޕީއެންއިން ބުނެފައި ވަނީ އެކުންފުނީގެ ކަސްޓަމަރުންގެ އަދަދަކީ 6.5 މިލިއަން ކަމަށާއި ކޭޕީއެން ބިލްޑިންގގައި ތިބެގެންނާއި، ޗައިނާގައި ތިބެގެން ކޭޕީއެންގެ ނަމްބަރުތަކުގެ ފޯނުތައް ވާވޭ ސްޓާފުންނަށް ހުރަހަކާ ނުލައި އަޑު އެހޭނެ ކަމަށެވެ.
ކޭޕީއެންއަށް 3ޖީއާއި 4ޖީގެ ސާމާނު ސަޕްލައި ކޮށްދީފައިވާ ވާވޭއިން ބުނެފައި ވަނީ އެކުންފުނިން ކޭޕީއެންގެ ސަބްސްކްރައިބަރުންގެ ފޯނުތައް އަޑު އަހާފައި ނުވާނެ ކަމަށެވެ.
މުހައްލިލުން ބުނާ ގޮތުގައި ވާވޭއަށް ބާޒާރުގައި ބޮޑު ހިއްސާއެއް ލިބިފައިވަނީ އެކުންފުނީގެ އުފެއްދުންތައް އިންތިހާއަށް އަގު ހެޔޮ ވުމުގެ ސަބަބުންނެވެ. އަދި މިހާރުގެ ދުނިޔޭގައި އެއިރު ހެދިހެން މުދަލުގެ އަގު ވައްޓާލައިގެން ބިޑް ކާމިޔާބު ކުރުމަކީ ގަބޫލު ކުރެވޭ ކަމެއްކަމުގައި ނުވެއެވެ.
ވާވޭއިން ބުނެފައި ވަނީ ނެދަރލެންޑްސްގައި 15 އަހަރު ވަންދެން އެކުންފުނިން މަސައްކަތް ކޮށްފައިވާ އިރު ދުވަހަކުވެސް ގަވާއިދާ ޚިލާފް ކަމެއް ކޮށްގެން ސަރުކާރުން އެކުންފުންޏަށް ތުހުމަތު ކޮށްފައި ނުވާ ކަމަށެވެ.
ނޫހުގައި ރިޕޯޓް ކޮށްފައިވާ ގޮތުން ވާވޭއިން ވަނީ ނެދަރލެންޑްސްގެ ކުރީގެ ބޮޑު ވަޒީރުގެ ފޯނު ކޯލުވެސް އަޑު އަހާފައެވެ. އެވާހަކަވެސް ވާވޭއިން ވަނީ ދޮގު ކޮށްފައެވެ.
މި މައްސަލާގައި އެކުލަވާލާފައިވާ ރިޕޯޓް ކޮންސަލްޓެންސީ ފާމުން މިހާރު ވަނީ ނެދަރލެންޑްސްގެ އިންޓެލިޖެންސް އެޖެންސީ އެވިޑްއާ ހިއްސާ ކޮށްފައެވެ.
އެވިޑްއިން 2019 ގައި އިންޒާރު ކޮށްފައިވާ ގޮތުން ޗައިނާއާއި ރަޝިޔާގެ ސޮފްޓްވެއަރ ނެދަރލެންޑްސް ގައި ބޭނުން ކުރުމަކީ އެގަމުގެ މަސްލަހަތަށް ރައްކާތެރި ކަމއެއއް ނޫނެވެ. އެއަށްފަހު ހަމަ އެއަހަރު ސަރުކާރު ޓާސްފޯސްއަކުން ވަނީ ޓެލެކޮމް ގައި ބޭނުން ކުރާ ސާމާނުތައް ގަންނަ ކުންފުނިތަކާއި ސާމާނުތައް ރަނގަޅަށް ދިރާސާ ކުރުމަށް އަންގާފައެވެ. އަދި އެމެރިކާގެ ފިއްތުންތަކާއެކު ވާވޭ، ނެދަރލެންދްސްގައި ފަހުން މަނާކުރިއެވެ. އަދި އެވިޑްގެ އިންޒާރާއެކު، ސަރުކާރުން ނިންމީ ގައުމުގެ 5ޖީ މުވާސަލާތީ ވިއުގައިގައި ޗައިނާގެ ވާވޭ ބައިވެރި ނުކުރުމަށެވެ.
ޑެއިލީ މެއިލް އިން ރިޕޯޓް ކޮށްފައިވާ ގޮތުން ފަހުން، 2020 އޮކްޓޯބަރުގައި ކޭޕީއެންގެ 5ޖީ ވިއުގަ ތައްޔާރު ކުރުމުގެ މަސައްކަތް ހަވާލު ކުރީ އެރިކްސަން ކުންފުންޏާ އެވެ.
ހަމައެއާއެކު ސަރުކާރުން ވަނީ މުވާސަލާތީ ދާއިރާގެ ހައްސާސް މަޢްލޫމާތު އަތުޖެހޭ މުވައްޒަފުންގެ ބެކްގްރައުންޑް ޗެކް ކުރުމަކީ މަޖުބޫރު ކަމެއް ކަމުގައި ހަދާފައެވެ.
ހުޅަނގުގައި އެތައް ގައުމަކުން ވަނީ ވޭވޭ އެމީހުންގެ 5ޖީ ނެޓަވަރކުން ބޭރުކޮށްފައެވެ. އެމެރިކާއިންވެސް ވަނީ ވާވޭ މަނާ ކޮށްފައެވެ.
އިނގިރޭސިވިލާތުގެ ޓެލެކޮމް ވިއުގައިގައި ބޭނުންކުރާ ވާވޭގެ ހުރިހައި ހާރޑްވެއަރއެއް 2027ގެ ނިޔަލަށް ބަދަލު ކުރުމަށް ސަރުކާރުން ވަނީ ނިންމާފައެވެ.
ޗައިނާގެ ވާވޭ ވުޖޫދަށް އައިސްފައި ވަނީ ކެނެޑާގެ ނޯޓެލް އިނދެޖެހުމަށްފަހުއެވެ. ނީޓެލް އަކީ އެންމެ ފުރަތަމަ 5ޖީގެ ދިރާސާތައް ހެދި ދުނިޔޭގެ އެންމެ ކުރީގައި އުޅުނު ކުންފުންޏެވެ.
