އިންޑިއާގެ ޒައިޑަސް ކަޑިއްލާއިން އުފެއްދި، ކޮވިޑް19އަށް ދޭ އައު ބޭހަކަށް އިންޑިއާގެ ޑްރަގް ކޮންޓްރޯލަރ ހުއްދަ ދީފިއެވެ. އެންޓި ވައިރަލް ޑްރަގް "ވައިރަފިން" ބޭނުން ކުރުމަށް ހުއްދަ ދީފައި ވަނީ ވަގުތީ ގޮތުންނެވެ.
މި ބޭހަކީ އިންޖެކްޝަނެއްގެ ޒަރީއާއިން ދޭ ބޭހެކެވެ. ކޮވިޑް19ގެ އާދައިގެ އަލާމާތްތައް ހުންނަ މީހުންނަށް މި އިންޖެކްޝަންގެ އެއް ޑޯޒް ދިނުމުން ހަތް ދުވަސް ތެރޭގައި ކޮވިޑަށް މީހާ ނައްސި ވެއެވެ. ޒައިޑަސް ކަޑިއްލާއިން ބުނި ގޮތުގައި މި އިންޖެކްޝަންގެ ނަތީޖާ، 91.15 އިންސައްތަ މީހުންނަށް ކާމިޔާބު ކަމަށް ދައްކައެވެ.
ޒައިޑަސް ކަޑިއްލާއިން ދަނީ ކޮވިޑް19އަށް ވެކްސިނެއްވެސް ތައްޔާރު ކުރަމުންނެވެ. އެކުންފުނިން ބުނާ ގޮތުގައި ޒައިކޯވީ-ޑީއަށް މެއި މަހު ހުއްދަ ލިބޭނެ ކަމަށް ލަފާ ކުރާ ކަމަށެވެ.
