އިންޑިއާގެ ވެކްސިން ޑިޕްލޮމެސީ ވަނީ ޓައިވާނަށްވެސް ފޯރާފައެވެ. މިދިޔަ މަހު އިންޑިއާއިން ވަނީ ޕެރަގުއޭއަށް އެއް ލައްކަ ޑޯޒް ވެކްސިން ފޮނުވާފައެވެ. ޕެރަގުއޭއަށް މި ވެކްސިން ލިބުނީ، ޓައިވާނުން އިންޑިއާއަށް އެދި ހުށަހެޅި ހުށަހެޅުމަކުންނެވެ.
ޗައިނާއިން ޕެރަގުއޭއަށް ހުށަހެޅީ، ޓައިވާނާއެކު އޮންނަ ސިޔާސީ ގުޅުން ކަނޑާލައި ޗައިނާއާއެކު ސިޔާސީ ގުޅުން ގާއިމް ކޮށްފިނަމަ ވެކްސިން ދޭނެ ކަމަށެވެ. އެއަށްފަހު ޓައިވާނުން ވެކްސިން ހޯދައި ދިނީއެވެ. ޕެރަގުއޭއަށް ވެކްސިން ހޯދައި ދިނުމަށް ޖަޕާނާއި އެމެރިކާއަށްވެސް ޓައިވާނުން ހުށަހެޅިއެވެ.
އިންޑިއާއިން ބުނެފައި ވަނީ ޕެރަގުއޭއަށް ވެކްސިން ފޮނުވާފައި ވަނީ އެގައުމުން އެކަމަށް އެދުމުން ކަމަށެވެ. އެކަމަކު ހަގީގަތުގައި ކަން ވެގެން ދިޔައީ އެހެނެއް ނޫނެވެ.
އިންޑިއާއަކީ އެއް ޗައިނާ ޕޮލިސީއަށް ތަބާވާ ގައުމެކެވެ. އެހެންވެ، އެހެން ގައުމުތަކެކޭ އެއްފަދައިން ރަސްމީ ސިފައެއްގައި ޓައިވާނަކީ ދައުލަތެއް ކަމަށް އިންޑިއާއަށް ގަބޫލު ކުރެވޭ ކަށެއް ނޯވެއެވެ. އެހެންނަމަވެސް ޓައިވާންގެ ސްޓްރެޓިޖިކް މުހިންމު ކަން އިންޑިއާއަށް އިޙުސާސް ކުރެވެއެވެ. ވަކިން ޚާއްސަކޮށް ގެލްވާން ވާދީގައި ޗައިނާއާ ކުރިމަތިލައިގެން އޮތް އިރު އިންޑިއާއަށް ވަނީ އާދަޔާ ޚިލާފް ގޮތްތަކެއް ޗައިނާގެ ގުޅުމުގައި އިޚުތިޔާރު ކުރުމަށް މަޖުބޫރުވެފައެވެ.
މިހާރު ދެގައުމުން ދަނީ އިގްތިސާދީ ގުޅުން ވަރުގަދަ ކޮށް އޭގެ ފައިދާ ނަގަމުންނެވެ. 2019 ވަނަ އަހަރު އިންޑިއާ ޓައިވާންގެ ވިޔަފާރި ގުޅުން ވަނީ 18 އިންސައްތައަށް އިތުރު ވެފައެވެ. އަދި ޓައިވާންގެ ޓެކްނޮލޮޖީ ދާއިރާގެ 200 އެއްހާ ކުންފުނިން ވަނީ އިންޑިއާގައި އިންވެސްޓް ކޮށްފައެވެ.
ޗިޕް އުފައްދާ ޓައިވާންގެ ފޮކްސްކޮމް އިން ވަނޚީ ފަސް ބިލިއަން ޑޮލަރު އިންވެސްޓް ކުރުމަށް ނިންމާފައެވެ. ޓެކްނޮލޮޖީގެ އަނެއް ބިޔަ ކުންފުނި ކަމަށްވާ ވިސްތްރޮން އިންވެސް ވަނީ 200 މިލިއަން ޑޮލަރު އިންވެސްޓް ކުރުމަށް ނިންމާފައެވެ.
އިންޑިއާ ސަރުކާރުން ވިސްނަމުން ދަނީ ސިންގަޕޯރއާއި ނިއުޒިލެންޑުން ޓައިވާނާއެކު ހަދާފައިވާ ފަދަ މިނިވަން ވިޔަފާރީގެ އެއްބަސްވުމެއް ޓައިވާނާއެކު ހެދުމަށެވެ.
