ހޮލީވުޑް އަދި ބޮލީވުޑްގެ ތަރި ޕްރިޔަންކާ ޗޯޕްރާ އާއި އޭނާގެ ފިރިމީހާ ލަވަކިޔުންތެރިޔާ ނިކް ޖޮނަސް އަށް ފަހު އަނުޝްކާ ގެ ދެމަފިރިން ވެސް ފަންޑުރައިޒާއެއް ހުޅުވާފައިއެވެ.
ބޮލީވުޑްގެ ބަތަލާ އަނުޝްކާ ޝަރުމާ އަދި އޭނާގެ ފިރިމިހާ ވިރާޓް ކޯލީ އިންޑިއާއަށް އައި ކޮވިޑްގެ ދެވަނަ ބޮޑު ރާޅާއެކު އެގައުމުގެ ރައްޔިތުންނަށް އެހީވުމުގެ ގޮތުން ފަންޑްރައިޒާއެއް ހުޅުވާފައިވާއިރު މިވާހަކަ އެދެމަފިރިން ހިއްސާ ކޮށްފައިވަނީ އެމީހުން އިންސްޓަގްރާމުގައި ވީޑިއޯއަކުންނެވެ.
މިވީޑއޯ ހިއްސާ ކުރަމުން އަނުޝްކާ ލިޔެފައިވަނީ އެ ގައުމަށްއާއި ކޮވިޑްގެ ދެވަނަ ބޮޑު ރާޅާއެކު އެގައުމުގެ ހެލްތުކެއާރ ސިސްޓަމަށް ދަނީ ބޮޑެތި ގޮންޖެހުންތަކާ ކުރިމަތިލަމުން ކަމަށާއި އެ ގައުމުގެ މީހުން އުޅެންޖެހޭ ހާލު ފެނުމުން ހިތްހަލާކުވާ ކަމަށެވެ. އެހެން ކަމުން އޭނާއާއި ވިރާޓުވަނީ ކެޓޯ އާއި ގުޅިގެން ފަންޑު ހޯދުމުގެ ގޮތުން އިން ދިސް ޓުގެދަރ ގެ ނަމުގައި ކެމްޕެއިނެއް ފަށާފައި ކަމަށެވެ. މިހާލަތުން އަރައިގަންނާނީ އެންމެން އެއްކޮށް ކަމަށާއި އިންޑީއާއި އިންޑީއާގެ ދިރިއުޅޭ ރައްޔިތުންނަށް އެހީވެދިނުމަށް ވެސް އަނުޝްކާވަނީ މި ޕޯސްޓުގައި ލިޔެފައިއެވެ. މި ދަތި ހާލަތުގައި ތިޔަބޭފުޅުންގެ ފަރަތުން ދޭ އެހީ މީހުންގެ ފުރާނަ ސާލާމަތް ކުރަން އެހީވެދޭނެ އަނުޝްކާ ލިޔެފައިވެއެވެ. މީގެ އިތުރަށް އޭނާ އެދިފައިވަނީ އޭނާގެ އިންސްޓަގްރާމް ބަޔޯ ގައިވާ ލިންކު ބޭނުންކޮށްގެން ތަފާތެއް ގެނަސްދިނުމަށާއި އެންމެންވެސް މާސްކުއަޅާއިގެން ރައްކާތެރިވެ ތިބުމަށެވެ.
މި ދެމަފިރިންގެ އަމާޒަކީ 7 ކުރޯޑު އިންޑީއަން ރުޕީސް އެއްކުރުމެވެ.އެދެމީހުންވަނީ ދެ ކުރޯޑް އިންޑީއަން ރުޕީޒް ހަދިޔާކޮށްފައިއެވެ. އަނުޝްކާގެ ދެމަފިރިންގެ އިތުރުން ޕްރިޔަންކާގެ ދެމަފިރިންވެސް ވަނީ އިންޑިއަށް އެހީވުމަށްޓަކައި ފަންޑްރައިޒާއެއް ހުޅުވާފައިއެވެ. މިހާތަނަށް އެ ފަންޑު ފޮއްޓަށް ހޯދިފައިވަނީ 6.6 ކުރޯޑު އިންޑިއަން ރުޕީސް އެވެ.
އާލިއާ ބަޓް، ދިޕިކާ ޕަޑުކޯން، ތާޕްސީ ޕަންނޫ އަދި ސޯނޫ ސޫދު ފަދަ ބޮލީވުޑްގެ ގިނަ ތަރިންތަކެއް ދަނީ އެމީހުންނަށް ވީ ވަރަކުން އިންޑީއާ މި ހާލަތުން އަރައިގަތުމަށް އެހީވަމުންނެވެ.
