މާލޭގެ ކާފިއު ވަގުތުގައި ޑެލިވަރީ ފާސް ދޫކުރުން އިކޮނޮމިކް މިނިސްޓްރީން ލިމިޓް ކޮށްފި އެވެ.
ކޮވިޑް-19 އިގެ ހާލަތު ގޯސްވެފައި ވާތީ ބަލި ކޮންޓްރޯލް ކުރުމުގެ ގޮތުން ހަވީރު 4:00 އިން ފަތިހު 4:00 އާއި ދެމެދު ބޭރަށް ނުކުމެ އުޅުން މިހާރު ވަނީ މަނާކޮށްފަ އެވެ. ނަމަވެސް އެ ވަގުތު ތަކުގައި ހާއްސަ ހުއްދަ އަކާއިއެކު ފިހާރަތަކަށާއި ކެފޭ ރެސްޓޯރެންޓްތަކަށް ރޭގަނޑު 12:00 ޖެހުމާއި ހަމައަށް ޑެލިވަރީ ކުރެވޭނެ އެވެ.
އިކޮނޮމިކް މިނިސްޓްރީން ނެރުނު އިއުލާނެއްގައި ވަނީ މިއަދުން ފެށިގެން ކާފިއު ވަގުތުތަކުގައި މުދާ ޑެލިވަރީ ކުރުމަށް ފުލުހުން ދޭ ހުއްދަ ދޫކުރާނީ ވަކި އަދަދަކަށް ކަމަށެވެ. މުދާ ޑެލިވަރީ ކުރާ ވިޔަފާރިތަކަށް ދޫކުރެވޭނީ ޑެލިވަރީ ކުރުމުގެ ދެ ފާހާއި އާއި ސަޕޯޓް ސްޓާފުންނަށް ދެ ފާހެވެ.
ކެފޭ އަދި ރެސްޓޯރެންޓްތަކަށް ދޫކުރާނީ ޑެލިވަރީ ކުރުމުގެ ދެ ފާހާއި ސަޕޯޓް ސްޓާފުންނަށް ހަތަރު ފާހެވެ. ރަށްރަށާއި ރިސޯޓްތަކަށް މުދާ ފޯރުކޮށް ދޭ ވިޔަފާރިތަކަށް ދޫކުރަނީ ދެ ފާހެވެ އެވެ. އެ ހުއްދަ ދޫކުރާނީ ފުލުހުން ކަމަށް އެ އިއުލާނުގައިވެ އެވެ.
އިކޮނޮމިކް މިނިސްޓްރީގެ އިއުލާނުގައި ބުނެފައިވަނީ ރަޖިސްޓްރީ ކޮށްފައިވާ އެހެން ވިޔަފާރިތަކަށް ދޭނީ އެންމެ ފާހެކެވެ. އެ ހުއްދަ ދޫކުރާނީ އިކޮނޮމިކް މިނިސްޓްރީން ކަމަށް އެ އިއުލާނުގައިވެ އެވެ.
އެ އިއުލާނުގައިވާ ގޮތުން ކަނޑައެޅިފައިވާ އަދަދަށް ވުރެ އިތުރަށް ފާސް ބޭނުންވާ ނަމަ، މުވައްޒަފުންގެ ތަފްސީލު އެ މިނިސްޓްރީއަށް ފޮޮނުވަން ޖެހޭނެ އެވެ. އަދި އެއަށް ވުރެ އިތުރަށް ފާސް ދޫކުރެވޭނީ މަސައްކަތުގެ ބާވަތަށް ބެލުމަށްފަހު އެ މިނިސްޓްރީން ކަމަށް އެ އިއުލާނުގައިވެ އެވެ.
