ކޮވިޑް-19 ރާއްޖޭގައި ފަތުއަޑުކިޔާފައި ފެތުރެނީއެވެ. ބަލީގެ ވޭން ތަހައްމަލް ކުރަމުންދާ މީހުންގެ އަދަދު އިތުރުވަނީއެވެ. ބަލީގެ ވޭނުގައި ދުނިޔެއާ އަލްވަދާއު ކިޔަމުންދާ މީހުންގެ އަދަދު އިންތިހާއަށް އިތުރުވަނީއެވެ.
ބަލިޖެހޭ މީހުން އިތުރުވެ އެޑްމިޓް ކުރާ މީހުންގެ އަދަދު އިތުރުވުމަކީ ސިއްހީ ނިޒާމަށް އޮތް ގޮންޖެހުމެކެވެ. އެހެނަކަމުން މިބަލިން ރައްކާތެރި ވުމަށް އަޅައިފައިވާ ފިޔަވަޅުތަކަށް އެންމެންވެސް ރައްކާތެރިވުމެވެ. މިބަލީގައި ރާއްޖެއިނ މިހާތަނަށް ވަނީ 102 މީހުން ނިޔާވެފައެވެ.
އެޗުޕީއޭގެ އެންމެފަހުގެ ހިސާބުތައް ދައްކާ ގޮތުން ބަލިޖެހިފައިވާ މީހުންގެ ތެރެއަށް 1433 މީހުން އިތުރުވެފައެވެ. އޭގެ ތެރެއިން މާލޭ ސަރަހައްދުން ވަނީ 1294 މިހުން އެބައްޔަށް ހުށަހެޅިފައެވެ. ރަށްރަށުން ވަނީ 134 މީހުން ހުށަހެޅިފައެވެ. ރިސޯޓުތަކުން ވަނީ 5 މީހުން ބައްޔަށް ހުށަހެޅިފައެވެ.
މިހާތަނަށް 45،956 މީހަކު ވަނީ ރާއްޖެއިން ކޮވިޑަށް ޕޮޒިޓިވް ވެފައެވެ. އޭގެ ތެރެއިން މިހާތަނަށް 28،849 މީހުން ވަނީ ބަލިން ފަސޭހަވެފައެވެ. އެކްޓީވް ކޭސްގެ ގޮތުގައި އަދި ވެސް 16،997 މީހުން އެބަތިއްބެވެ.
އެހެންވީމާ ބަލިން ރައްކާތެރިވުމަށް ރަނގަޅަށް މާސްކު އަޅާށެވެ. ގައިދުރުކަން ބަހައްޓާށެވެ. ސައިބޯނި ލައިގެން ގިނަގިނައިން އަތްދޮންނާށެވެ. ބޭރަށް ދިއުން މަދުކުރާށެވެ. ދިމާވާ މީހުންގެ އަދަދު ވީހާ ވެސް މަދު ކުރާށެވެ.
