ފިލްމު "ރާދޭ" ކުޅެމުން ދިޔައިރު ސަލްމާން ޚާން ގައިގައި އޮޅިގެން ޖެހުނު ކަމަށް އެކްޓަރ ގޯތަމް ގުލާޓީ ބުނެފިއެވެ.
ޔޫޓިއުބު ޗެނަލް އަކަށް އިންޓަވިއުއެއް ދެމުން އެކްޓަރ ގޯތަމް ބުނީ ރާދޭ ފިލްމު ޝޫޓް ކުރުމުގައި ސަލްމާނާއެކު ތަޅާ މަންޒަރެއް ކުޅުމަށް އޭނާ އަށް ޖެހުމުން އެކަމާ ވަރަށް ހިތް ނުތަނަވަސްވެ ބިރުގަތް ކަމަށެވެ. އަދި އެކްސިޑެންޓަކުން ސަލްމާން ގައިގައި އޭނާ އަށް ޖެހުނު ކަމަށެވެ. އޭނާ އެވަގުތު ސަލްމާން ގެ ކިބައިން މަޢާފަށް އެދުނު ކަމަށްވެސް ބުންޏެވެ. ނަމަވެސް ސަލްމާން އެއީ ކަމަމަކަށް ނަހަދާ ހީލާފައި "ޑޯންޓް ވޮރީ" އޭ ބުންޏެވެ. މިގޮތަށް ކަންތައް ދިމާވުމުން އޭގެ ފަހުން ޝޫޓް ކުރި ހުރިހާ މަންޒަރެއްގައި ވެސް އޭނާ ވަރަށް ވިސްނައިގެން އެއްވެސް މީހަކު ގައިގައި ނުޖޭހޭތޯ ބެލިކަމަށް ކިޔައިދިނެވެ.
ފިތުރު ޢީދުގައި ރިލީޒް ކުރި ރާދޭ ފިލްމުގައި ގޯތަމް ކުޅުނީ ނުބައި (ނެގެޓިވް) މީހެއްގެ ރޯލެވެ. މި ފިލްމުގައި ސަލްމާން ޚާން ފެނިގެންދަނީ ޕޮލިސް އިނިސްޕެކްޓަރެއްގެ ރޯލުންނެވެ.
ގޯތަމް ގުލާޓީ އަކީ ބިގް ބޮސް 8 ކާމިޔާބު ކުރި ތަރިއެވެ. ސަލްމާން ހޯސްޓްކުރާ ބިގް ބޮސް، 8 އިން ވިދާލި ގޯތަމް ގުލާޓީ ބުނިގޮތުގައި އޭނާ ރާދޭގައި ދެއްކި ހުނަރަށް ސަލްމާން ހިތްހަމަ ޖެހި ތަޢުރީފު ކުރި ކަމަށެވެ. "އިންޑިއާގެ ފިލްމް އިންޑަސްޓްރީގެ އެންމެ ކުޅަދާނަ ހުނަރުވެރި ތަރިން ގެ ތެރޭގައި ހިމެނޭ ސަލްމާން ޚާންގެ ފަރާތުން އަހަރެންގެ ހުނަރަށް ތަޢުރީފު ލިބުމަކީ ވަރަށް ބޮޑު ކަމެއް" ގޯތަމް ބުންޏެވެ.
ގޯތަމް ގުލާޓީގެ އިތުރަށް މި ފިލްމުގައި ޑިޝާ ޕަޓާނީ އާއި ޖެކިސް ރޮފް އަދި ރަންދީޕް ހޫޑާ މުހިއްމު ރޯލުތަކުން ފެނިގެން ދެއެވެ.
