މިއަދުގެ ހުކުރު ނަމާދުގެ ވަގުތާ ދިމާކޮށް އިސްރާއީލުގެ އުދުވާނީ ފުލުހުން އަގްސާ މިސްކިތް ސަރަހައްދަށް ވަދެގަނެ ދިން ހަމަލާތަކުގައި 20 މީހުން ޒަޚަމްވި ކަމަށް ފަލަސްތީނުން ބުނެފިއެވެ.
އިސްރާއީލުން ޣައްޒާއަށް ދެމުންގެންދިޔަ ހަމަލާތައް ހުއްޓާލަން މަޖުބޫރުވެ، ޣައްޒާގެ މުޖާހިދުންނަށް ލިބުނު ނަސްރު ފާހަގަކޮށް އުފާފާޅު ކުރުމަށާއި، ހުކުރު ނަމާދަށް އަގްސާ މިސްކިތަށް މިއަދު އެތައްހާސް ބަޔަކު ޖަމާވިއެވެ.
ނަމަވެސް، މި މަންޒަރު އުދުވާނީ އިސްރާއީލަށް ކެތްކުރެވޭ ވަރު ކަމަކަށް ނުވިއެވެ.
ހުކުރު ނަމާދު ނިމި، ފަލަސްތީނުގެ އެތައްހާސް ބަޔަކު އުފާފާޅު ކުރަމުން ގެންދަނިކޮށް އިސްރާއީލުގެ ވެރިންގެ އަމުރަށް ރަޔަޓް ފުލުހުން އަގްސާ މިސްކިތް ސަރަހައްދަށް ކުއްލިއަކަށް ވަދެގަނެ ފަލަސްތީނު މީހުންނަށް ހަމަލާދޭން ފެށީއެވެ.
ފަލަސްތީނު މީހުންވެސްވަނީ، ދިފާއުގައި އިސްރާއީލު ފުލުހުންނާ ކުރިމަތިލާފައެވެ.
މި ކުރިމަތިލުންތަކުގެ ތެރޭގައި އިސްރާއީލު ފުލުހުން ހަމަލާދިނުމުގެ ސަބަބުން 20 މީހުންނަށް ބޮޑެތި އަނިޔާތައް ލިބުނު ކަމަށް ފަލަސްތީނުގެ ރެޑް ކްރެސެންޓުން ބުނެފައި ވެއެވެ.
ދެފަރާތުން ވެވުނު އެއްބަސްވުމުގެ ދަށުން، ޣައްޒާއަށް ދެމުންގެންދިޔަ ހަމަލާތައް ރެއިން ފެށިގެން ހުއްޓާލި ނަމަވެސް، ފަލަސްތީނުގެ އެހެން ހިސާބުތަކުގައި އިސްރާއީލުގެ ސަލާމަތީ ބާރުތަކާއި، ފަލަސްތީނު މީހުންނާ ދެމެދު މިހާރުވެސް ވަރުގަދަ ކުރިމަތިލުންތައް ހިނގަމުން އެބަދެއެވެ.
ހުޅަނގު އައްސޭރީގެ ނާބުލުސްގައި ފަލަސްތީނު ޒުވާނުންނާއި، އިސްރާއީލު ސިފައިންނާ ދެމެދު ވަރަށް ވަރުގަދަ ކުރިމަތިލުންތައް ހިނގާފައިވާއި، ހުޅަނގު އައްސޭރީގެ ބައިތާ ނަކަށްކިޔާ އަވަށެއްގައި ފަލަސްތީނުގެ ޒުވާނުންވަނީ ހަމަލާދީ އިސްރާއީލު ސިފައިންގެ ތިންމީހުން ޒަޚަމް ކޮށްލާފައެވެ.
އިސްރާއީލާ ދެކޮޅަށް ހަނގުރާމަކޮށް ޣައްޒާގެ މުޖާހިދުން ހޯދި ކާމިޔާބީ ފާހަގަކޮށް ޣައްޒާގެ އިތުރުން، ފަލަސްތީނުގެ ހުރިހާ ރަށްތަކެއްގައި އާންމުން މަގުތަކަށް ނުކުމެ އުފާފާޅު ކުރަމުންދާއިރު، ފަލަސްތީނުގެ ގިނަ ބަޔަކު ބުނަމުންދަނީ، ހަމަލާތައް ހުއްޓާލި ނަމަވެސް، އިސްތިއުމާރުގެ ކިބައިން ސަލާމަތްވީ ނޫން ކަމަށާއި، ފަލަސްތީނު މިނިވަން ކުރުމުގެ މަސައްކަތް އަދިއޮތީ ކުރިއަށް ކަމަށެވެ.
