ހުޅުމާލޭ ފޭސް 1 ގައި ހުންނަ ޣާޒީ ސްކޫލުގެ ލިޓުލްމެއިޑު ދަރިވަރުންނަށް ޓީމް ބިލްޑިންގ ހަރަކާތްތަކެއް ކުރިއަށް ގެންގޮސްފިއެވެ.
ފުލުހުން ބުނީ މި މަހު 23 ވަނަ ދުވަހު، ޣާޒީ ސްކޫލުގައި ކުރިއަށް ގެންދިޔަ މި ހަރަކާތްތަކަކީ އެ ސްކޫލުގެ ލިޓުލް މެއިޑް ކޭންޕުގެ ތެރެއިން ކުރިއަށް ގެންދިޔަ ހަރަކާތްތަކެއް ކަމަށެވެ.
އެގޮތުން ޕަބްލިކް ޓްރަސްޓް އެންޑް ކޮންފިޑެންސް މެނޭޖްމަންޓާއި ޣާޒީ ސްކޫލު ގުޅިގެން ކުރިއަށް ގެންދިޔަ މި ހަރަކާތުގައި ޓީމެއްގެ ގޮތުގައި މަސައްކަތްކުރާނެ ގޮތްތަކާއި ޓީމެއްގެ ގޮތުގައި ގުޅިގެން މަސައްކަތް ކުރުމުގެ މުހިންމުކަން ދަރިވަރުންގެ އުމުރާ ގުޅޭގޮތަށް ކިޔައިދީ، ޓީމެއްގެ ގޮތުގައި މަސައްކަތް ކުރުމުން ނުކުންނާނެ ރަނގަޅު ނަތީޖާތައް ވެސް ކިޔައިދީފައިވެއެވެ.
މީގެ އިތުރުން، ދަރިވަރުންނާ ގުޅޭ ޝައުގުވެރިވާނެފަދަ ކުޅިވަރުތައް ވެސް ކުރިއަށް ގެންގޮސްފައިވާ ކަމަށްވެސް ފުލުހުން ބުންޏެވެ.
ޣާޒީ ސްކޫލުގެ ލިޓުލް މެއިޑް 113 ދަރިވަރުން މި ހަރަކާތްތަކުގައި ބައިވެރިވިވެފައިވެއެވެ.
