ޣައްޒާގައި ހުންނަވާ ހަމާސްގެ ސިޔާސީ ގޮފީގެ ލީޑަރު ޔަހްޔާ ސިންވާރު، އިސްރާއީލުން ދިން އުދުވާނީ ހަމަލާތަކަށްފަހު ފުރަތަމަ ފަހަރަށް އާންމުންގެ ތެރެއަށް ނުކުމެވަޑައި ގެންފިއެވެ.
ޔަހްޔާ ސިންވާރުވަނީ، އިސްރާއީލު ސިފައިންގެ ހަމަލާތަކުގައި ޝަހީދުކޮށްލި، ހަމާސްގެ އަސްކަރީ ކޮފި، އަލްޣައްސާމް ބްރިގޭޑުގެ އިސް ކޮމާންޑެއް ކަމަށްވާ ބާސިމް އީސާގެ ގެއަށް ޒިޔާރަތް ކުރައްވާފައެވެ.
އަދި އިސްރާއީލުގެ ހަމަލާތަކުގައި ޝަހީދުވި މުޖާހިދުންނާއި، އަދި އާންމުންގެ ހަނދާނުގައި ޣައްޒާގައި ބޭއްވި އެތައް ހަފްލާއެއްގައި ޔަހްޔާ ސިންވާރު ބައިވެރިވެ ވަޑައިގެންނެވިއެވެ.
ޔަހްޔާ ސިންވާރު އާންމުންގެ ތެރެއަށް ނުކުމެވަޑައިގެން، އެތައް ބަޔަކާ ބައްދަލުކުރައްވައި، ސަލާމް ކުރައްވަމުން ގެންދެވި މަންޒަރުތައް ފެންނަ ވީޑިއޯތަކާއި ފޮޓޯތައް ފަލަސްތީނުގެ ސޯޝަލް މީޑިއާ ފުރާލާފައި ވެއެވެ.
ޔަހްޔާ ސިންވާރު އާންމުންގެ ތެރެއަށް ނުކުމެވަޑައިގެން އުޅުއްވީ އެއްވެސް ހާސްކަމެއް، ބިރުފުޅެއް ނެތިކަން މީޑިއާއިން ފާހަގަ ކޮށްފައި ވެއެވެ.
އިސްރާއީލު ސިފައިން ޣައްޒާއަށް ބޮމާއި މިސައިލުން ދިން ހަމަލާތަކުގެ މައިގަނޑު އެއް އަމާޒަކަށްވީވެސް ޔަހްޔާ ސިންވާރު އަވަހާރަ ކޮށްލުމެވެ. ޣައްޒާގައި ހުންނަ ޔަހްޔާ ސިންވާރުގެ ގެކޮޅަށް ބޮންއަޅައި އިސްރާއީލުން ބިމާހަމަކޮށްލިއެވެ.
ނަމަވެސް، އިސްރާއީލުން ހަމަލާ ދިންވަގުތު، ޔަހްޔާ ސިންވާރުވެސް އަދި އޭނާގެ އާއިލާގެ މެމްބަރަކުވެސް ގޭގައި ނޫޅުއްވާތީ އެ ބޭފުޅުން ސަލާމަތްވެވަޑައި ގެންނެވިއެވެ.
އިސްރާއީލުގެ ހަމަލާތަކުގައި، ހަމާސްގެ ސިޔާސީ ގޮފީގެ އެހެން އިސް ބޭފުޅުންނާއި، އަދި ހަމާސްގެ އަސްކަރީ ގޮފި، އަލްޣައްސާމް ބްރިގޭޑުގެ އިސް ކޮމާންޑަރާއި، ޑެޕިއުޓީ ކޮމާންޑަރުގެ އިތުރުން، އެހެން އިސް ކޮމާންޑަރުންގެ ގެތަކަށްވެސް ހަމަލާތައް އަމާޒުކުރިއެވެ.
އޭގެ ތެރޭގައި، ޣައްސާމް ބްރިގޭޑުގެ އަނެއް ޑެޕިއުޓީ ކޮމާންޑަރ މަރްވާން އީސާއާއި، މުހަންމަދު ދެއީފްވެސް ހިމެނިވަޑައި ގަންނަވައެވެ. ނަމަވެސް، އެ ހުރިހާ ބޭފުޅުންވެސް އެއްވެސް އަނިޔާއެއް ލިބިވަޑައިނުގެން ވަނީ ސަލާމަތްވެފައެވެ.
ހަމާސްގެ ޣައްޒާގެ އެންމެ އިސްވެރިޔާ ޔަހްޔާ ސިންވާރު، ގަދަވެ ސަލާމަތުން ހުންނަވައި އާންމުންގެ ތެރެއަށް ނުކުމެވަޑައިގެން، އާންމުންނާ ބައްދަލުކުރައްވައި ގޭގެއަށް ޒިޔާރަތް ކުރެއްވި މަންޒަރުގެ ފޮޓޯތަކާއި، ވީޑިއޯތައް އެންމެ ގިނައިން ޝެއަރކޮށް، ޝުއޫރުތައް ފާޅުކުރަމުންދާ އެއްބަޔަކީ، އިސްރާއީލުގެ ސިޔާސީ މީހުންނާއި، އާންމުންނެވެ.
ގިނަމީހުންގެ ރުޅި އަމާޒުވަމުންދަނީ ބޮޑުވަޒީރު ބެންޖަމިން ނަތަންޔާހޫ އަށާއި، ސިފައިންނަށެވެ.
ނަތަންޔާހޫ ޣައްޒާއާ ދެކޮޅަށް "ހަނގުރާމަ" ފެށީ، ޣައްޒާގެ ބިމުން ހަމާސްއާއި، ހަމާސްގެ ވެރިންނާއި، އިސްލާމިކް ޖިހާދު ޖަމާއަތް އެއްކޮށް ނައްތާލައި، އެމީހުންގެ ބިންގަރާސް ވިއުގަތައްވެސް މުޅިން ހަލާކުކޮށް ފަސްއަޅައި ފޮނުވާނޭ ކަމަށް އިސްރާއީލުގެ އާންމުންނަށް ވައުދުވުމަށް ފަހުގައެވެ.
ނަމަވެސް، 11 ދުވަސް ވަންދެން ޣައްޒާގެ އެތަން މިތަނަށް ބޮންއެޅުމަށްފަހު، ނަތަންޔާހޫގެ އަމުރަށް އިސްރާއީލު ސިފައިން އެނބުރި އައީ "ހުސްއަތާ" އެވެ.
އިސްރާއީލު ސިފައިންގެ ހަމަލާތަކުގައި ޣައްޒާގެ ކުޑަކުދިންނާއި، އެތައް އާންމުން ޝަހީދުވެ، ޣައްޒާ ސުންނާފަތި ކުރިނަމަވެސް، ހަމާސްއާއި، އިސްލާމިކް ޖިހާދަށް ދެވުނު އެއްވެސް ގެއްލުމެއް ނެތްކަމަށް އިސްރާއީލުގެ މީޑިއާއިން ބުނަމުން އެބަގެންދެއެވެ. ހާސިލްވީ ކޮން ކަމެއްތޯ، ހަނގުރާމައިގެ ނަތީޖާއަކީ ކޮބައިތޯ، އިސްރާއީލުގެ އާންމުންނާއި ސިޔާސީ މީހުންވެސް ސުވާލު ކުރަމުން އެބަގެންދެއެވެ.
އިސްރާއީލުގެ މީޑިއާއިންވެސް މިކަމާބެހޭ ތަފާތު ރިޕޯޓްތައް ލިޔެ، ޣައްޒާއަށް ހަމަލާދިނުމުގެ މަގްސަދަކީ ކޮބައިތޯ ސުވާލު ކުރަމުން ގެންދެއެވެ.
