ސަރުކާރުގެ ނުކުޅެދުންތެރިކަމުގެ އަގު މިހާރު ދައްކަން ޖެހިފައިވަނީ މީހުންގެ ފުރާނައިން ކަމަށް ވިދާޅުވޭ ކުރީގެ ނާއިބު ރައީސް ޑރ. މުޙައްމަދު ޖަމީލް އަޙުމަދު ސަރުކާރަށް ފާޑު ވިދާޅުވެއްޖެއެވެ.

ހިފެހެއްޓުމެއްނެތި ރާއްޖޭގައި ކޮވިޑް ފެތުރެމުންދާތީ އެމަނިކުފާނު ކުރެއްވި ޓުވީޓެއްގައި ވިދާޅުވެފައިވަނީ ކޮވިޑްގެ އެންމެ ނުރައްކާތެރި ޙާލަތަށް ވެސް ތައްޔާރުވެފައިވާ ކަމަށް ސަރުކާރުން ކުރިން ވިދާޅުވި ކަމަށެވެ. އެހެން ވިދާޅުވަމުން އެކަމަށް 3.5 ބިލިއަން ރުފިޔާ ވެސް ޚަރަދުކޮށްފައިވާ ކަމަށް ވިދާޅުވެފައިވެއެވެ. އެހެނަސް ގޯސް ހާލަތު އައިސް ބައްދަލުކުރި އިރު އައިސީޔޫގައި އެނދު އިތުރު ނުވާކަމަށާއި އަތޮޅުތަކުގައި ޓެސްޓް ހެދޭނެ ގޮތެއް ވެސް ނެތް ކަމަށެވެ. އެއީ ސަރުކާރުން ހިންގާފައިވާ "ޖަރީމާ" ގެ ހެއްކެއް ކަމަށް ވެސް ވިދާޅުވެފައިވެއެވެ.

"އެންމެ ގޯސް ޙާލަތަށް ތައްޔާރުކަމަށްބުނެ 3.5 ބިލިއަން ޚަރަދުކޮށްފި.އައިސީޔޫ އެނދު އިތުރު ނުވި.އަތޮޅުތެރޭގައި ޓެސްޓް ހެދޭނެ ގޮތް ނެތުމަކީ ސަރުކާރުން ހިންގާފައިވާ ޖަރީމާގެ ހެއްކެއް. ނުކުޅެދުންތެރިކަމުގެ އަގު ދައްކަންޖެހެނީ ފުރާނައިން،" ކަމަށް އެމަނިކުފާނު ވިދާޅުވެފައިވެއެވެ.

އެމަނިކުފާނު ނިންމަލައްވާފައިވަނީ ސަރުކާރަށް ސުވާލެއް ރައްދު ކުރައްވަމުންނެވެ. "ބަހަނާ ހުއްޓާލައި ވެކްސިން އަވަސްކުރަން ނުވޭތޯ؟" އެވެ. ކޮވިޑް ޖެހިގެން މިހާތަނަށް ރާއްޖެއިން ވަނީ 134 މީހުން ނިޔާވެފައެވެ.

އިތުރު ލިޔުންތައް ކޮވިޑް 19