ކޮވިޑް19އަށް ބިރުން ސިންގަޕޯރ އިން ދެކުނު އޭޝިއާގެ މަސައްކަތްތެރިން އެގައުމަށް އެތެރެވުން ހުއްޓުވުމުގެ ސަބަބުން ސިންގަޕޯރގެ އިގްތިސާދީ ދުވެލި މަޑު ޖެހުމަކާ ގާތް ވެއްޖެއެވެ. ސިންގަޕޯރގެ މަސައްކަތް ކުރާ ގިންތީގެ ތިންބައިކުޅަ އެއްބަޔަކީ ބޭރު މީހުންނެވެ. މިމީހުންގެ ތެރޭގައި ގިނަ މީހުންނަކީ އިންޑިއާއާއި ބަންގްލަދޭޝްގެ މީހުންނެވެ.
ނިއްކީ އޭޝިއާއިން ރިޕޯޓް ކުރާ ގޮތުގައި ބޭރުގެ މަސައްކަތްތެރިންގެ ތަދުމަޑުކަމެއް ސިންގަޕޯރއަށް ކުރިމަތި ވުމުގެ ސަބަބުން ޚާއްސަ ގޮތެއްގައި ކޮންސްޓްރަކްޝަންގެ ދާއިރާގެ ޕްރޮޖެކްޓްތައް ވަނީ އަހަރަކަށް ވުރެން ގިނަ ދުވަހަށް ލަސްވެގެން ގޮސްފައެވެ. އަދި މަސައްކަތްތެރިން އިތުރު ގަޑީގައި މަސައްކަތް ކުރަން ޖެހުމާއި އެމީހުންނަށް ދޭ އުޖޫރަ 30 އިންސައްތައަށް އިތުރު ވެގެން ދިއުމަކީ ކޮންސްޓްރަކްޝަންގެ ދާއިރާއަށް ހީނަރުކަން މެދުވެރިވެފައިވާ ކަމެކެވެ.
ނިއްކީއޭޝިއާއިން ބައެއް ލޭބަރުންނާ ހަވާލާދީ ބުނިގޮތުގައި ބައެއް ދުވަސްތަކުގައި ދެ ދަންފަޅިއަށްވެސް ހަފްތާގެ ދެބައިކުޅަ އެއްބައިގައި މަސައްކަތަށް ނިކުންނަން ޖެހެއެވެ. ކޮންމެ ދަންފަޅިއަކީ އަށް ގަޑި އިރެވެ.
ސިންގަޕޯރގެ ކޮންސްޓްރަކްޝަން ދާއިރާއާއި ބޯޓް ބަނުމުގެ ދާއިރާއާއި ފެކްޓްރީތަކުގައި މަސައްކަތް ކުރާ މީހުން ކޮވިޑްއާ ގުޅިގެން ވަރަށް ބޮޑުތަން މަދުވެގެން ދިޔައެވެ.
ސިންގަޕޯރ އިން އަދިވެސް ވަނީ ކުރު މުއްދަތަށް އެގައުމަށް ވަންނަ މީހުންނަށް ހުރަސް އަޅާފައެވެ.
ބޭރު ގައުމުތަކަށް މަސައްކަތު ފޮނުވައިގެން ގައުމުތަކުން ބޭރު ފައިސާގެ ރަނގަޅު އަދަދެއް ހޯދައެވެ. ވިއެޓްނާމުން މިއަހަރު އަންދާކޮށްފައި ވަނީ ކުރިއަށް އޮތް ފަސް އަހަރަށް ބަހާލައިގެން ފަސް ހާސް މީހުން ބޭރު ގައުމުތަކަށް ވަޒީފާއަށް ފޮނުވާށެވެ.
