ދެބޭންގެ ދެދަރިންގެ ކައިވެނީގެ ސަބަބުން އިނގިރޭސިވިލާތުގައި ގިނަ އަދަދެއްގެ ކުޑަ ކުދިން މަރުވުމާއި ނުކުޅޭ ހާލު ކުދިން އުފަންވުމުގެ މައްސަލަތައް ގިނަ ކަމަށް ރިޕޯޓް ކޮށްފިއެވެ. "ބޯން އިން ބްރެޑްފޯރޑް" ރިޕޯޓްގައި ބުނެފައި ވަނީ މި މައްސަލަ އެންމެ ގިނައިން ދިމާވަނީ ޕާކިސްތާން ދަރިކޮޅުގެ މީހުންނަށް ކަމަށެވެ. އަދި މި މައްސަލަ ދިމާވާ ޕާކިސްތާން މީހުންނަކީ ދެބޭންގެ ދެދަރިހާ ގާތުން ޚާންދާންގެ ތެރޭން ކައިވެނިކޮށްގެން އުޅޭ މީހުން ކަމަށެވެ.
ޑެއިލީ މެއިލްގައި މިކަމާ ގުޅޭ ގޮތުން ތައްޔާރުކޮށްފައިވާ ރިޕޯޓްގައި ބުނެފައި ވަނީ ބްރެޑްފޯޑާއި ބަރމިންހަރމްގައި ކުދިން މަރުވުމާއި އާދަޔާ ޚިލާފު ގިނައިން ނުކުޅެދޭ ކުދިން ވިހެއުމުގެ ސަބަބުން ދިރާސާތައް ހަދާފައިވާ ކަމަށެވެ. މި ދެ ސިޓީގައިވެސް އިނގިރޭސިވިލާތުގެ އެހެން ތަންތަނާ އަޅާބަލާއިރު ނިސްބަތުން ވިހާ ކުދިންގެ ސިއްޙީ މައްސަލަތައް ގިނަކަމަށް ދައްކައެވެ.
ބްރެޑްފޯރޑްގައި އުފަންވާ ކުދިންގެ ދެބައިކުޅަ އެއްބަޔަކީ ޕާކިސްތާން ދަރިކޮޅުގެ ޖޯޑްތަކަށް ލިބޭ ކުދިންނެވެ. މި ކުދިންގެ ތިންބައިކުޅަ ދެބައި ކުދިންނަކީ ޕާކިސްތާންގެ ދަރިކޮޅުގެ ސެކަންޑް ކަޒިންއާ ކައިވެނިކޮށްގެން އުޅޭ މީހުންގެ ކުދިންނެވެ.
އިނގިރޭސިވިލާތުގައި އެހެން ތަންތާނގައި ކުދިން މަރުވާ ނިސްބަތަށް ވުރެން ބަރމިންހާމްގައި ގިނައިން ބޭބީތައް މަރުވާކަން ފާހަގަ ވެގެން ސިޓީ ކައުންސިލުން ވަނީ މިކަމާ ބެހޭ ދިރާސާއެއް ހައްދާފައެވެ. އެގޮތުން މަރުވާ ކުދިންގެ ފަސްބައިކުޅަ އެއްބަޔަކީ ޖީންގެ މައްސަލައެއް ހުރެގެން މަރުވާ ކުދިންނެވެ. މިއިންވެސް އެނގިގެން ދިޔައީ މިމީހުންނަކީ ޕާކިސްތާން ދަރިކޮޅު ކަމަށާއި އަދި މިއީ ކަޒިންތަކުގެ މެދުގައި ކައިވެނި ކުރުމުން ޖީން ހަލާކުވެގެން މަރުވާ ކުދިން ކަމަށެވެ.
ބަރމިންހާމްގައި ޕާކިސްތާން ޖޯޑްތަކަށް އަލަށް ވިހާ ކޮންމެ 188 ކުއްޖަކަށް އެއް ކުއްޖަކު މަރުވެއެވެ. ހުދު މީހުންގެ ތެރޭގައި މި ނިސްބަތް އުޅެނީ ކޮންމެ 295 ކުއްޖަކަށް އެއް ކުއްޖެކެވެ.
