ޕާކިސްތާންގައި އިދިކޮޅު ފަރާތްތަކުން ބޮޑު ވަޒިރު އިމްރާން ޚާންގެ ސަރުކާރާ ދެކޮޅަށް އަނެއްކާވެސް މުޒާހަރާތައް ފަށަން ނިންމައިފިއެވެ. އިދިކޮޅު އެތައް ޕާޓީއަކުން ގުޅިގެން ހަދާފައިވާ ޕާކިސްތާން ޑިމޮކްރެޓިކް މޫވްމަންޓުން އަލަށް ފެށި މުޒާހަރާތަކާއި އެއްވުމުގެ ފުރަތަމަ ބުރު ބާއްވާނެ ކަމަށް އިޢްލާން ކޮށްފައި ވަނީ ޖުލައި 4 ގައި ސްވަޓްގައެވެ.
މިމުޒާހަރާތަކުގައި އިސްވެ ހުންނަވަނީ ޖަމުއިއްޔަތޭ އުލަމާއޭ އިސްލާމް ފަޒްލް ގުރޫޕްގެ ވެރިޔާ މައުލާނާ ފަޒުލުއްރަޙްމާން އެވެ.
ސްވަޓްގެ މުޒާހަރާތަކަށް ފަހު އިސްލާމްއާބާދާއި ކަރާޗީއާއި އިތުރު މުޒާހަރާތައް ބާއްވާނެ ކަމަށްވެސް އިޢްލާން ކޮށްފައި ވެއެވެ. މައުލާނާ ފަޒުލުއްރަޙްމާނާއި ބައިވެރިން ވަނީ ޕާކިސްތާންގައި އިލެކްޓްރޯނިކް ވޯޓިންގ މެޝިން ބޭނުން ކުރުމާވެސް ދެކޮޅު ހަދާފައެވެ.
ބޮޑު ވަޒީރު އިމްރާން ޚާންގެ ސަރުކާރުން މަސައްކަތް ކުރަމުން ގެންދަނީ ދެން އޮންނަ އިންތިޚާބެއްފައި އިލެކްޓްރޯނިކް ވޯޓިންގ މެޝިން ބޭނުން ކުރުމަށެވެ. އިދިކޮޅު ފަރާތްތަކުން ބުނާ ގޮތުގައި އިލެކްޝަން ކޮމިޝަން އޮފް ޕާކިސްތާނުން ހުރިހައި އިދިކޮޅު ފަރާތްތައް މި ކަމާ ބެހޭ މަޝްވަރާއަށް ދައުވަތުދޭން ވާނެ ކަމަށެވެ.
ޕާކިސްތާންގެ ރައީސް އިލެކްޓްރޯނިކް ވޯޓިންގ މެޝިން ބޭނުން ކުރުމަށް ރިއާސީ ގަރާރެއްވެސް ނެރުއްވާފައެވެ. އިދިކޮޅު ފަރާތްތަކުން ވަނީ މިއީ އިންތިޚާބް އޮޅުވާލުމުގެ މަސައްކަތެއްކަމަށް ބުނެފައެވެ.
ޕާކިސްތާންގެ އިދިކޮޅު ޕާޓީތަކިގެ މެދުގައި މާޗް މަހުން ފެށިގެން ވަނީ ދެ ބަސްވުން އުފެދިފައެވެ. ޕާކިސްތާންގެ މައި އިދިކޮޅު ޕާޓީކަމަށްވާ ޕީޕަލްސް ޕާޓީ އިން ވަނީ ފަޒުލުއްރަޙްމާނުގެ އިއްތިހާދުން ބޭރުވެގެންފައެވެ.
އިދިކޮޅު ފަރާތްތަކުގެ މެދުގައި މައްސަލައަކަށްވީ ޕާލަމެންޓްގެ މަތި ގޭގައި އިދިކޮޅު ލީޑަރު އައްޔަން ކުރުމާ މެދު ބަހުސްކުރުމަށްފަހު ހުރިހައި އިދިކޮޅު ޕާޓީތަކަށް ވަކި މީހަކާ މެދު އެއްބަސް ނުވެވިގެންނެވެ.
ޕާކިސްތާން ޕާލަމެންޓްގެ ދަށުގޭގެ އިދިކޮޅު ލީޑަރަކީ، ޕާކިސްތާން މުސްލިމް ލީގް ނަވާޒްގެ ޝާހްބާޒް ޝަރީފްއެވެ.
