ދިއްގަރު ދާއިރާގެ މެމްބަރު އިކްރާމް ހަސަން ކޮވިޑް-19 އަށް ޓެސްޓު ކުރަން ސާމްޕަލް ނެގި ސިއްހީ ހިދުމަތްތެރިޔާ އަށް ހަމަލާދީ، މަރާމާރީ ހިންގައި މަގާމުގެ ހައިސިއްޔަތު ބޭނުންކޮށް ބިރުދައްކަން މަސައްކަތް ކުރި މައްސަލަ ރައްޔިތުންގެ މަޖިލީހުގެ އިމްތިޔާޒު އަދި ސުލޫކީ ކޮމިޓީން ބަލައިދިނުމަށް މޯލްޑިވްސް ހެލްތު ޕްރޮފެޝަނަލް ޔޫނިއަން އިން މިއަދު ހުށަހަޅައިފި އެވެ.
މިދިޔަ ހުކުރު ދުވަހު މާފަންނު މަދަރުސާގައި މެމްބަރު އިކްރާމް ކޮވިޑަށް ޓެސްޓު ކުރަން ސާމްޕަލް ނެގި މީހަކަށް ހަމަލާދިން ކަމަށް ބުނާ މައްސަލަ މިހާރު ފުލުހުން އަންނަނީ ބަލަމުންނެވެ.
ތުހުމަތުތައް ދޮގުކޮށް އިކްރާމް ވިދާޅުވީ ސާމްޕަލް ނެގި މީހާ އަށް ހަމަލާ ދީފައި ނުވާނެ ކަމަށް ވިދާޅުވެފަ އެވެ. އަދި އެއަށްވުރެ ރީތިކޮށް އެކަން ކުރެވިދާނެ ކަަމަށް އިކްރާމް ވަނީ ވިދާޅުވެފައެވެ. އަދި މީގެ ކުރިން ދެފަހަރެއްގެ މަތިން އައިޖީއެމްއެޗް އިން ސާމްޕަލް ނެގިކަމަށާ އެފަހަރު ވެސް ސާމްޕަލް ނެގީ ވަރަށް އޯގާތެރިކޮށް ކަމަށް އިކްރާމް ވިދާޅުވިއެވެ.
"ރައްޔިތުން އިންތިހާބުކުރާ، ރައްޔިތުން ތަމްސީލުކުރާ އިއްޒަތްތެރި މަގާމެއްގައި ހުރެ، ރައްޔިތުންނަށް އާއްމު ހިދުމަތް ދިނުމަށް މަސައްކަތްކުރާ އާދައިގެ މުވައްޒަފަކަށް ފުރައްސާރަކޮށް ހަމަލާދީ އަދި އެކަން ދިފާއުކުރަމުންދާ ދިއުން މި ޔޫނިއަން އިން ހަރުކަށި އިބާރާތުން ކުށްވެރި ކުރަމެވެ. މިކަމާ މެދު، މުވައްޒަފު ތަމްސީލުކުރާ އެއްވެސް ވުޒާރާއަކުން މި އަމަލު ކުށްވެރިކޮށް އެކަށީގެންވާ ފިޔަވަޅުތަކެއް އަޅާފައި ނުވާ ކަމީ މި ޔޫނިއަން އިން ކަންބޮޑުވާ ކަމެކެވެ،" ބަޔާނުގައި ބުންޏެވެ.
އެފަދަ އަމަލުތަކުގެ ސަބަބުން ޕްރޮންޓްލައިންގައި މަސައްކަތްކުރާ މީހުންނަށް ނަފްސާނީ ގޮތުންނާއި ޖިސްމާނީ ގެއްލުން ލިބެމުންދާކަން ފާހަގަކޮށް، އެފަދަ އަމަލުތައް ހިންގާ މީހުންނާ މެދު ފިޔަވަޅު އަޅައިދިނުމަށް ހެލްތު ޕްރޮފެޝަނަލް ޖަމިއްޔާ އިން ގޮވާލާފައި ވެ އެވެ.
