ބޭރުގައުމުތަކަށް ޒިޔާރަތް ކުރާއިރު ތިމާގެ ހަނދާންތައް ތާރީޚަށް ދެމެހެއްޓުމަށް އާސާރީ ތަންތާނގައި ގްރެފިޓީ ލިޔަން ނޫޅޭށެވެ. މި ނަސޭހަތް ކިޔާލަން ނުލިބުނު ޗައިނާ މީހާއަށް ވީގޮތް އެނގޭ ހެއްޔެވެ؟
ޖަޕާނުގައި ދިރިއުޅޭ ޗައިނާގެ ރައްޔިތަކަށް ޓޯކިޔޯގެ ކޯޓަކުން އިއްޔެ ކުރި ހުކުމްގައި އަށް މަސް ދުވަހުގެ ޖަލު ހުކުމެއް އިއްވާފައި ވެއެވެ.
މިޗައިނާ މީހާގެ ކުށަކީ، ޓޯކިޔޯގައި ހުންނަ ހަނގުރާމަވެރިންގެ ޔާސުކުނީ ޝްރައިން ޒިޔާރަތުގައި ގްރެފިޓީ ކުރެހުމެވެ. އޭނާ އެކަން ކޮށްފައި ވަނީ މެއި މަހު އެވެ.
އުމުރުން 29 އަހަރުގެ ޖިއާންގް ޒުއޯޖޫންއަށް ޓޯކިޔޯ ޑިސްޓްރިކްޓް ކޯޓުގައި ދައުވާކޮށްފައި ވަނީ އާންމު މުދަލަށް ގެއްލުން ދިނުމާއި އަޅުކަންކުރާ ތަނަކަށް އިހުތިރާމް ކުޑަކުރީކަމަށް ތުހުމަތު ކޮށެވެ.
ދައުވާގައި ވާގޮތުން އޭނާ އާއި ޗައިނާގެ އިތުރު ދެ މީހަކު ވަނީ މެއި މަހުގެ 31 ވަނަ ދުވަހު އެ ޒިޔާރަތުގައި ހުރި ހިލަ ތަނބެއްގައި "ފާޚާނާ" މިފަދައިން ސްޕްރޭ ޕެއިންޓުން ލިޔެފައެވެ.
