ޗައިނާއިން އިނގިރޭސިވިލާތުގައި ނިއުކްލިއަރ ރޮގުން ގުޅިގެން ރިސާޗް ހެދުމަށް 2015 ގައި ވެފައިވާ އެއްބަސްވުން އިނގިރޭސިވިލާތުން މުރާޖައާ ކުރަން ފަށައިފިއެވެ. 2015 ގައި އިނގިރޭސިވިލާތުން ޗައިނާއާއެކު ބެއިޖިންގ ބޭއްވި މަޝްވަރާތަކުގައި އެއްބަސްވީ މެންޗެސްޓަރ ގައި ރިސާޗް ލެބެއް ގާއިމް ކުރުމަށްފަހު، ދެ ގައުމުން ގުޅިގެން މި ލެބްގައި ނިއުކްލިއަރ އާ ގުޅޭ ދިރާސާތައް ކުރިއަށް ގެންދިއުމަށެވެ.
އިނގިރޭސިވިލާތުގެ ޖާސޫސީ އިދާރާ އެމްއައި5 އިން ވަނީ މިފަދަ ދާއިރާއަކުން ޗައިނާއާއެކު ދިރާސާތައް ހެދުމަކީ އިނގިރޭސިވިލާތުގެ ގައުމީ ސަލާމަތަށް ނުރައްކާތެރި ކަމެއްކަމަށް ބުނެފައެވެ.
50 މިލިއަން ޕައުންޑްގެ މި ޕްރޮޖެކްޓް ކުރިއަށް ނުގެންދިއުމަށް ނިންމައި ސަރުކާރުން ވަނީ އެކަން މިހާރު އިއްލާން ކޮށްފައެވެ.
އިނގިރޭސިވިލާތުން ވަނީ ޗައިނާއާ ދެކޮޅަށް ބައެއް ފިޔަވަޅުތައް އަޅާފައެވެ. އެގޮތުން އިނގިރޭސިވިލާތުގެ 5ޖީ ޓެކްނޮލޮޖީގައި ޗައިނާ ބައިވެރި ނުކުރުމަށް ނިންމާފައި ވެއެވެ. އަދި ޔޫކޭގެ މުވާސަލާތީ ވިއުގައިން 2027އާ ހަމައަށް ޗައިނާގެ އާލާތްތައް ނަގައި މުވާސަލާތީ ވިއުގަ ސާފު ކރުމަށް ވެސް ނިންމާފައި ވެއެވެ.
