ވާލު އިންސާނުންނާއެކު އުޅޭތާ އެތައް ހާސް އަހަރެއް ވެއްޖެއެވެ. ވާލު ކައިފައި ހުންނަ މޭވާވެސް އިންސާނުން ކައިފައި ވެއެވެ. އެކަމަކުވެސް 2020އާ ހަމައަށް އިންސާނުންނަށް ވާލުގެ ފުށުން ކޮރޯނާ ވައިރަސް ޖެހިފައެއް ނުވެއެވެ.
ކޮރޯނާ ވައިރަސްގެ ބަހުސްގައި ދެ ސުއާލެއް ކުރެވެއެވެ. އެއް ސުއާލަކީ، ކޮރޯނާ ވައިރަސް ކޮވިޑް19އަކީ، ލެބޯޓްރީއެއްގައި އުފައްދާފައިވާ އެއްޗެއް ހެއްޔެވެ؟
ދެވަނަ ސުއާލަކީ، މި ވައިރަސް އިންސާނުންގެ ގަޔަށް އަރާފައި ވަނީ ލެބޯޓްރީއަކުން ވައިރަސް ލީކުވެގެން ހެއްޔެވެ؟
ޚަބަރު ދިރާސާ ކުރާ ފަރާތްތަކަށް ފާހަގަ ކުރެވޭނެ ފަދައިން މިހާރު އާންމު ބަހުސަކަށް ވެފައި ވަނީ ލެބް ތިއަރީއާ ބެހޭ ގޮތުންނެވެ. މާނައަކީ ލެބަކުން ބޭރުވެގެން އުޅުނު ވައިރަސްއެއް ވަބާއަކަށްވެގެން ދިޔައީއެވެ. އެމެރިކާއިން ބުނަކީ މިކަމަށް ބާރުއަޅާ ހެކިތައް ލިބިފައިވާ ކަމަށެވެ. އަދި އެމެރިކާގެ ރައީސް އިރުޝާދު ދެއްވާފައި ވަނީ މި އެންގަލުން މަޢްލޫމާތު ހޯދާށެވެ.
ސުއާލަކީ، މިއީ ލެބެއްގައި ތަރައްގީ ކޮށްފައިވާ ވައިރަސްއެއް ކަމަށް ބުނެ، އެމެރިކާއިން އެކަން ހޯދުމަށް މާބޮޑު ޝައުގުވެރި ކަމެއް ނުދައްކަނީ ކީއްވެގެން ހެއްޔެވެ؟
އެމެރިކާގެ ނޭޝަނަލް އިންސްޓިއުޓް ފޮރ އެލަރޖީ އެންޑް އިންފެކްޝަސް ޑިޒީޒްއިން ނިއުޔޯކްގެ އީކޯ ހެލްތު އެލައެންސްގެ ރައީސް ޕީޓަރ ޑަޒާކްއަށް ކޮރޯނާ ވައިރަސް ތަރައްގީ ކުރުމަށް ފަންޑް ދިނެވެ. މިފައިސާ ބޭނުން ކޮށްގެން ވޫހާން ލެބަށް ކޮރޯނާ ވައިރަސް ތަރައްގީ ކުރުމުގެ މަސައްކަތް ހަވާލު ކުރީ ޑާޒާކްއެވެ. އަދި ލެބުން ވައިރަސް ލީކުވި ކަމަށް ބުނާ ވާހަކައާ އެންމެ ބޮޑަށް ދެކޮޅު ހަދާ މީހަކީވެސް ޑާޒާކްއެވެ.
އިންޑިއަން އިންސްޓިއުޓް އޮފް ޓެކްނޮލޮޖީ ދިއްލީގެ ދެ ބައެލޮޖިސްޓުން 30 ޖެނުއަރީ 2020ގައި ހެދި ދިރާސާތަކުން ދައްކަނީ ވާލުން އުފެދިގެން އަންނަ ކޮރޯނާ ވައިރަސް އަކީ އޭގައި އިންސާނުންގެ ޕުއްޕާ މޭ ސެލްގައި ތަތް ލެވުން ކުޑަ ކޮރޯނާ ވައިރަސްއެއް ކަމަށެވެ. ރާހުލް ބަހޫލިކާރުއާއި މޮނާލީ ރަހާލްކާރުގެ ދިރާސާއިން އެނގުނީ ގުދުރަތީ ކޮރޯނާ ވައިރަސްގައި ނުފެންނަ ތަތްލަވާ ހަތަރު ސްޕައިކެއް (ދައްގަނޑެއް) ފެތުރިގެން އުޅޭ ކޮރޯނާ ވައިރަސްގެ ޕްރޮޓިންއަށް އިތުރު ވެފައިވާ ކަމަށެވެ. އަދި ހަތަރު ތައްލަވާ ސްޕައިކް ނުވަތަ ދައްޗަކީ، އިންސާނުންގެ ޕުއްޕާމޭގެ ސެލްގައި ގަދައަށް ތައްލަވާ އެއްޗެއް ކަމަށެވެ.
2020 ޖެނުއަރީގައި މިމީހުން ގެ މި 22 ސަފްހާގެ ދިރާސާ ޝާއިއުކުރުމުން ފާޑުކިޔުންތައް އަމާޒު ވުމާއެކު އެމީހުންނަށް މަޖުބޫރުވީ މި ދިރާސާ އަނބުރައި ނަގާށެވެ. ނަމަވެސް މިހާރު އަލުން ލެބެއްގައި އުފައްދާ ފައިވާ ކަމަށް ބުނާ ތިއަރީއަށް ވާހަކަ ދެކެވެމުން ދިރާސާ ކުރާފަރާތްތަކުން ވަނީ މި 22 ސަފްހާގެ ދިރާސާ އަލުން ހާމަ ކޮށްފައެވެ.
އެންމެ ފަހުން ކުރެވުނު އިންޓަރވިއުގައި މި ދެ ސައިންޓިސްޓުން ވަނީ މިހާރު ފެތުރެމުން މިދާ ކޮރޯނާ ވައިރަސްއަކީ ގުދުރަތީ އެއްޗެއް ނޫން ކަމަށް ބުނެ އެމީހުންގެ ހޯދުންތަކަށް ބާރުއަޅާފައެވެ.
