ޗައިނާއިން ލަދާޚްގައި އިންޑިއާއާ ކުރިމަތި ލުމަކީ އިންޑިއާއަށް އަސްކަރީ ރޮނގުންނާއި ގައުމީ އުފެއްދުންތެރިކަމުގެ ރޮނގުން ފުރުސަތުތަކެއް ފަހިކޮށްދިން ކަމެއް ކަމަށް އޭޝިއާ ނިއްކީ ނޫހުން ބުނެފިއެވެ. އިންޑިއާއާ ޗައިނާގެ ކުރިމަތި ލުން ދިމާވީ، އަމިއްލަ އުފެއްދުމަށް ހިތްވަރު ދިނުމުގެ ކެމްޕޭނެއް އިންޑިއާއިން ފަށައިގެން ކުރިއަށް ދަނިކޮށެވެ. އިންޑިއާއިން ނިންމާފައި ވަނީ ދިފާއީ ރޮނގުންވެސް ބޭނުންވާ ހަތިޔާރުތައް އެތެރެ ކުރުމުގެ ބަދަލުގައި އަމިއްލަ ގައުމުގައި އެތަކެތި އުފެއްދުމަށް މަސައްކަތް ކުރާށެވެ.
އިންޑިއާގެ ދިފާއީ ހޭދަ ވަނީ އިތުރު ވެގެން ގޮސްފައެވެ. ޗައިނާއިން ވެސް އަދި ޕާކިސްތާނުންވެސް ދިފާއީ ހޭދަ އިތުރުކޮށްފައި ވެއެވެ.
އިންޑިއާއިން ވަނީ 200 ބާވަތުގެ އަސްކަރީ ސާމާނުތައް އެތެރެ ކުރުން މަނާ ކޮށް ބްލެކް ލިސްޓެއް އެކުލަވާލާފައެވެ. އޭގެ ތެރޭގައި ހިމެނޭ އައިޓަމު ތަކުގައި ހެލިކޮޕްޓަރުން ގޮސް ރޭޑާ ސިސްޓަމްވެސް ހިމެނެވެ.
އިންޑިއާއިން ބްލެކް ލިސްޓެއް އެކުލަވާލައިފައި ވީނަމަވެސް މިއަށް އަމަލު ކުރަން ފަށާނީ މަޑުމަޑުންނެވެ. އަމާޒަކީ 2025އަށް އެއްކޮށް އެބާވަތްތައް އެތެރެ ކުރުން ހުއްޓާލުމެވެ.
ލަދާޚްގައި އިންޑިއާއާއި ޗައިނާގެ ސިފައިންގެ ކުރިމަތިލުމަކީ 45 އަހަރުގެ ތެރޭގައި ދެފަރާތުން އެއްބަޔަކު އަނެއް ބަޔަކާ ދިމާއަށް ދިރޭ ވަޒަން ބޭނުން ކުރި ފުރަތަމަ ފަހަރެވެ.
ނިއްކީން ބުނާ ގޮތުން އިންޑިއާއިން އެކުލަވާފައިވާ ލިސްޓާއި އަދި އިންޑިއާއިން މިހާރު އަސްކަރީ ސާމާނުތައް ގަންނަން ދިމާކޮށްފައިވާ ގޮތުން ދޭހަވަނީ އިންޑިއާއާއި ޗައިނާގެ ކުރިމަތިލުން އަވަހަށް ނިމޭނެ ކަމަށް އިންޑިއާއިން ނުދެކޭ ކަމަށެވެ.
އިންޑިއާއިން އެކުލަވާލާފައިވާ ލިސްޓުން ފައިދާ ފެންނަކަމަށް ބުނަމުން ނިއްކީން ބުނަނީ މި ފަހުން އިންޑިއާ ސިފައިންނަށް ގަންނަން އިޢްލާން ކުރި ގިނަ ހަތިޔާރު ތަކަކީ އަމިއްލައަށް އުފައްދާފައިވާ ތަކެތި ކަމަށެވެ.
