ޕާކިސްތާންގައި ފަގީރުންގެ ނިސްބަތް އެއް ދަރަޖަ މައްޗަށް ޖެހިއްޖެ ކަމަށް ވަރލްޑް ބޭންކުން ބުނެއެވެ. ކޮވިޑްގެ ހާލަތާ ގުޅިގެން ދެ މިލިއަން މީހުން ފަގީރުންގެ ލިސްޓަށް ވެއްޓިފައިވާ ކަމަށް އެ ބެންކުން ބުނެއެވެ. ކުރިން އަންދާސާ ކޮށްފައިވާ ގޮތުން ފަގީރުންގެ ނިސްބަތް އުޅުނީ އާބާދީގައި 4.4 އިންސައްތައިގައެވެ. މިހާރު 5.5 އިންސައްތައިގައެވެ.
ވަރލްޑް ބޭންކުން މިހެން ބުނިނަމަވެސް ޕާކިސްތާން ސަރުކާރުން އަދި ޝާއިއުކޮށްފައިވަނީ މިދިޔަ އަހަރުގެ ކުރީ އަހަރުގެ ތަފާސްހިސާބެވެ. އެއާއެއްގޮތަށް ބަލަނީ ނަމަ ޕާކިސްތާންގައި ފަގީރުންގެ ނިސްބަތް ދަނީ ދަށްވަމުންނެވެ.
ކޮވިޑްއާ ގުޅިގެން ޕާކިސްތާންގައި އަޅާފައިވާ ފިޔަވަޅުތަކުގެ ސަބަބުން އިގްތިސާދުވެސް ވަނީ ކުރިން އޮތް ވަރަށް ވުރެން 1.5 ޕަސެންޓަށް ދަށަށް ގޮސްފައެވެ.
ޕާކިސްތާންގައި އަލަށް ފަގީރުންގެ ލިސްޓަށް އިތުރު ވެފައިވާ ދެ މިލިއަން މީހުންނަކީ ދުވާލެއްގެ މައްޗަށް 1.90 އެމެރިކާ ޑޮލަރު އާމްދަނީއަށް ނުލިބޭ މީހުންނެވެ.
މިދިޔަ ދެ އަހަރުގެ ތެރޭގައިވެސް ޕާކިސްތާންގެ އިގްތިސާދު ކުރިއަރާފައިވަނީވެސް ލަސްލަހުންނެވެ. މިއީ ދެކުނު އޭޝިއާ ގައުމުތަކުގެ ތެރޭން އެންމެ ކުޑަކޮށް ކުރިއަރައިގެންދާ އެއް އިގްތިސާދެވެ. އެކަމަކު ޕާކިސްތާނަކީ ބޭރުގައުމުތަކަށް ވަޒީފާއަށް މީހުން ފޮނުވުމުގެ ނިސްބަތުން ދެކުނު އޭޝިއާގައި އެއްވަނަ އެވެ.
