ދުނިޔޭގެ ގައުމުތައް ކޮވިޑް19 އާ ހަނގުރާމަ ކުރަމުން ދަނީއެވެ. އިގްތިސާދު ކޮއްޅަށް ޖަހާނެ ގޮތްގޮތާ ބެހޭ ގޮތުން ހުރިހައި ފެންވަރެއްގައި ސައްލާ ކުރެވެމުން ދަނީއެވެ. ހަނގުރާމައެއްގެ ވިލާގަނޑެއް ބޯމަތި ވުމަކީ ބޭނުން ވާނެ ކަމެއް ނޫނެވެ. ނަމަވެސް ދޭދޭ ގައުމުތަކުގެ މެދުގައި އިތުބާރު ގެއްލުމާއި އެއްބަޔަކު އަނެއްބަޔަކަށް އިޙުތިރާމް ނުކުރުމާއި ބޮޑުކަން ދެއްކުމުގެ ސަބަބުން ނުރައްކަލަށް ހުށަހެޅޭހެންވެސް ހީވެއެވެ.
އިންޑިއާ ޗައިނާ
އިންޑިއާ އިން ބުނިގޮތުގައި ނިއުދިއްލީން އޮތީ ޗައިނާއަށް ފާރައަށެވެ. ޗައިނާގެ ކަނޑުގެ ސިފައިން ސްރީލަންކާގެ ބަނދަރަކަށް ފޭބި ވާހަކަ އިންޑިއާގެ މީޑިއާއިން ދަނީ ފަތުރަމުންނެވެ. ޗައިނާގެ ތެލުގެ ބޮޑު ބައެއް މި ސަރަހައްދުން ހުރަސްކުރާކަމަށް ވިދާޅުވަމުން އިންޑިއާގެ މީރުބަހުރު ވިދާޅުވީ، އެއްފަހަރާ 80 އެއްހައި އަސްކަރީ އުޅަނދު އަރަބި ކަނޑުގެ ސަރަހައްދުގައި ހަރަކާތްތެރިވާ ކަމަށެވެ. އަދި ޗައިނާގެ ތެޔޮ މިހިސާބުން ދަތުރުކުރާތީ ޗައިނާވެސް ހަރަކާތްތެރިވާނެ ކަމަށެވެ.
އޭނާ ވިދާޅުވީ އިންޑިއާގެ ކަނޑުގެ ސަރަހައްދަށް އެއްވެސް ނުރައްކަލެއް ކުރިމަތިވާނެ ނަމަ އިންޑިއާއިން އެކަމާ ދެކޮޅަށް ތެދުވާނެ ކަމަށެވެ. އަދި ސަރަހައްދުން ބޭރުގެ ބާރެއް ސަރަހައްދަށް ވަދެފައި ވުމަކީ އެކަމާމެދު ފާރަވެރިވެ ނުތަނަވަސްވާން ޖެހޭނެ ކަމެއް ކަމަށެވެ.
ޗައިނާ އެމެރިކާ
ޗައިނާއާއި އެމެރިކާގެ ދެމެދުގެ އިތުބާރު އާލާކުރުމަށް މަސައްކަތެއް ނުކުރެވެއެވެ. އެމެރިކާގެ ރައީސް ބޭއްވެވި ޖީ7ގެ ބައްދަލުވުމާއި ނޭޓޯ ސަމިޓްގައިވެސް ޗައިނާއާ ކުރިމަތިލާނެ ގޮތާ ބެހޭ ގޮތުން މަޝްވަރާ ކުރެވުނެވެ. ޗައިނާއަށް ފާޑު ކިޔުން އަމާޒު ކުރެވުނެވެ. އެމެރިކާއިން ދައްކައި ދެނީ ޗައިނާއަކީ ކުރިމަތިލާން ޖެހޭ ދުޝްމަނެއްގެ ގޮތުގައެވެ.
ޗައިނާގެ ސަރުކާރު ޓީވީ ސީސީޓީވީން ރިޕޯޓް ކުރިގޮތުގައި މެއި މަސް ނިމުނުހާ ހިސާބުގައި އެމެރިކާއާއި ޗައިނާ ތިންވަނަ ބޮޑު ހަނގުރާމައެއް ނުފެއްޓީ ހަމަ ކިރިޔާއެވެ. ވަކި ގައުމެއްގެ ނަން ހާމަ ނުކޮށް މި ރިޕޯޓްގައި ބުނެފައި ވަނީ ޗައިނާގެ ވައިގެ ސަރަހައްދަށް މަތިންދާބޯޓްތަކެއް ވަންނަން ދިމާކުރުމުން އެ އުޅަނދުތައް ފައްސާލި ކަމަށެވެ. މި ރިޕޯޓްގައި އަޑު ގެނެސްދިން ޕައިލެޓް ބުނެފައި އޭނާގެ އިންޒާރަށްފަހުވެސް އެ ބޯޓްތައް ޗައިނާގެ ވައިގެ ސަރަހައްދަށް މިސްރާބު ޖެހިކަމަށެވެ. ނަމަވެސް ހަނގުރާމައިގެ އުކުޅު ދެއްކުމުން އެމީހުން ފަސް ޖެހުނީ ކަމަށެވެ.
ޕައިލެޓް ބުނިގޮތުގައި އިތުރަށް އެމީހުން ކުރިއަށް ދިޔަ ނަމަ އެ ބޯޓްތައް ވައްޓާލާކަށް އޭނާ ފަހަތަށް ނުޖެހުނީސް ކަމަށެވެ.
އިނގިރޭސިވިލާތާއި ޗައިނާއާއި ރަޝިޔާ
މަޢްލޫމާތުގެ ރަސްމަގުގައި މަގު ފޭރުމާއި ހަމަލަތައް ދިނުން ވަނީ އާންމު ކަމަކަށް ވެފައެވެ. ހުޅަނގުގެ ގައުމުތަކުން ބުނާ ގޮތުން މި މަސައްކަތުގައި އުޅެނީ ރަޝިޔާ މީހުންނާއި ޗައިނާ ޗެންޑޫގައި މިކަމަށް ޚާއްސަކޮށް ތައްޔާރުކޮށްފައިވާ ސިފައިންގެ ލަޝްކަރަކުންނެވެ.
ރަޝިޔާއިން މަޢްލޫމާތުގެ ރަސްމަގުގައި މަގު ފޭރުމަށް ފަހު ފިދުޔަ ހޯދާކަމަށް ބުނެއެވެ. އެމެރިކާގެ ކޮލޯނިއަލް ތެޔޮ ހޮޅި އެތައް ދުވަހަކަށް ބަންދުކޮށްގެން އެ ހޮޅި އަލުން ބޭނުން ކުރެވުނީ މަގުފޭރުނު މީހުންނަށް ކްރިޕްޓޯ ކަރަންސީން ފައިސާ ދީގެންކަމަށް އެމެރިކާ ފަރާތްތަކުން ބުނެއެވެ. ޗައިނާއިން މަޢްލޫމާތުގެ ރަސްމަގުގައި ސިނާއީ އަސްކަރީ މަޢްލޫމާތު ވަގަށް ނަގާކަމަށް ތުހުމަތު ކުރެއެވެ.
އިނގިރޭސިވިލާތުގައި ބުނާ ގޮތުން މަޢްލޫމާތުގެ ރަސްމަގަށް ހަމަލަދީ މުޅި އިނގިރޭސިވިލާތް އިނދެ ޖައްސާލުމަކަށް ޗައިނާއާއި ރަޝިޔާއަށް މާގިނަ ވަގުތެއް ނުނަގާނެ ކަމަށެވެ.
އިނގިރޭސިވިލާތުގެ ދަށުގޭގެ ދިފާއީ ކަންތައްތަކާ ބެހޭ ކޮމިޓީގެ ރައީސް އެމްޕީ ޓޯބިއަސް އެލްވުޑް ވިދާޅުވާ ގޮތުން އިނގިރޭސިވިލާތް ބަލިކޮށްލާކަށް އަސްކަރީ ހަމަލައެއް ދޭކަށް ނުޖެހެއެވެ. ޗައިނާއާއި ރަޝިޔާއިން ގުޅިގެން ސައިބާ ހަމަލައެއްދީ، އިނގިރޭސިވިލާތުގެ މީހުންގެ ދިރިއުޅުން ހުއްޓުމަކަށް ގެނެވިދާނެ ކަމަށެވެ. އޭނާ ވިދާޅުވީ މިފަދަ ހަމަލައަކުން އިގްތިސާދު ވެސް ހުއްޓުވުމަކަށް ގެނެވިދާނެ ކަމަށެވެ. އިތުރަށް އޭނާގެ ވާހަކަ ސާބިތުކޮށް ދެއްވުމަށް ވިދާޅުވީ އިނގިރޭސި ޕާލަމެންޓަށާއި އިނގިރޭސިވިލާތުގެ ސިއްޙީ ނިޒާމަށްވެސް ސައިބާ ހަމަލަތައް ދީފައިވާނެ ކަމަށެވެ. އަދި ސެޓެލައިޓްތަކަށް ހަމަލަދީ ޖީޕީއެސްގެ ނިޒާމުވެސް ހުއްޓުމަކަށް ގެނެވިދާނެ ކަމަށެވެ.
ޗައިނާ ޓައިވާންޗައިނާއިން ވަނީ ޓައިވާންގެ ވައިގެ ސަރަހައްދަށް 28 މަތިން ދާބޯޓެއް ވައްދައި ޓައިވާނަށް ގަނާ ކޮށްފައެވެ. މީގެ ތެރޭގައި ނިއުކްލިއަރ ބޮން އުފުލާ ބޯޓެއްވެސް ހިމެނެއެވެ. މިމަހުގެ މެދުތެރޭގައި ހިނގި މިހާދިސާގައި ޓައިވާންގެ މަތިންބޯޓްތަކުން ވަނީ ޗައިނާ އުޅަނދުތައް ފައްސާލާފައެވެ. އަދި މަތިންދާބޯޓާ ދެކޮޅަށް ބޭނުންކުރާ މިސައިލްގެ ނިޒާމު ވެސް ޓައިވާނުން ތައްޔާރު ކުރިކަމަށް މިހާރު ރިޕޯޓްތައް ބުނެއެވެ.
ޓައިވާން ކަނޑު އޮޅިއަކީ، މިހާރުގެ އެންމެ ނާޒުކު އެއްމަސްރަހެވެ. ކޮމިއުނިސްޓް ޕާޓީގެ ވެރިކަމަށް 100 އަހަރުވާއިރު ޗައިނާއިން ދަނީ އިތުރަށް ޓައިވާނާ ދެކޮޅަށް ހަރުކަށިކަން ދައްކަން ފަށާފައެވެ.
ނޭޓޯގެ ބައްދަލުވުމުގައި ނޭޓޯއިން ޗައިނާއަށް ގޮވާލައިފައި ވަނީ ބައިނަލްއަގްވާމީ ނިޒާމަށް ޗައިނާއިން ބޯލަބައި ލުމަށެވެ. ނޭޓޯއިން ޗައިނާއަކީ ބައިނަލްއަގްވާމީ ނިޒާމަށް ބޯލަނބައި ނުލާ ގައުމެއް ކަމަށް ނިންމައިފިނަމަ ދެން ވާނީ ކިހިނެއް ހެއްޔެވެ؟ ނަމަވެސް އަދި މިއީކީ އެމެރިކާގެ ރަންޒަމާނެއްވެސް ނޫނެވެ.
