ކޮވިޑް19ގެ ސަބަބުން ގައުމުތަކަށް ލިބޭ ބޭރުގެ އިންވެސްޓްމެންޓްތައް މަދުވެގެން ގޮސްފައިވާ ކަމަށް އދން ބުނެފިއެވެ. ޔޫއެން ކޮންފަރެންސް އޮން ޓްރޭޑް އެންޑް ޑިވެލޮޕްމެންޓް (އަންކްޓެޑް) އިން އިންވެސްޓްމެންޓް ރިޕޯޓް 2021ގައި ބުނެފައި ވަނީ ގައުމުތަކަށް ލިބޭ ބޭރުގެ އިންވެސްޓެމެންޓް (އެފްޑީއައި) 35 އިންސައްތަ ދަށަށް ގޮސްފައިވާ ކަމަށެވެ. 2020ގައި 1.5 ޓްރީލިއަން ޑޮލަރުގައި އޮތުމަށްފަހު މިހާރު ބޭރުގެ އިންވެސްޓްމެންޓްތައް ވަނީ އެއް ޓްރީލިއަން ޑޮލަރަށް ވެއްޓިފައި ކަމަށެވެ.
އަންކްޓެޑްގެ ރިޕޯޓް ބުނާ ގޮތުން މުޅި ދެކުނު އޭޝިއާއަށް ލިބިފައިވަނީ 71 ބިލިއަން ޑޮލަރުގެ ބޭރުގެ އިންވެސްޓްމެންޓްތަކެވެ. މިއީ 20 އިންސައްތައިގެ އިތުރުވުމެކެވެ.
ކޮވިޑްގެ ހާލަތާ ގުޅިގެން ދުނިޔެއިން ގިނައިން އެދިފައިވަނީ ޑިޖިޓަލް އިންފްރާސްޓްރަކްޗަރ އަދި މުވާސަލާތާ ބެހޭ އިންވެސްޓްމެންޓްތަކެވެ. އެހެންވެ، އައިސީޓީގެ ދާއިރާއަށް ގިނަ އެފްޑީއައި ގޮސްފައިވާކަން ފާހަގަ ކުރެވެއެވެ.
ޖުމުލަކޮށް މުޅި ދުނިޔޭގެ ނިސްބަތުން އެފްޑީއައި ދަށްވިކަމަށް ދެއްކިނަމަވެސް، ދެކުނު އޭޝިއާގައި އެންމެ ގިނައިން ބޭރުގެ އިންވެސްޓްމެންޓްތައް ހޯދާފައި ވަނީ އިންޑިއާއިން ނެނެވެ. 2019ގައި އިންޑިއާއަށް 51 ބިލިއަން ޑޮލަރުގެ އިންވެސްޓްމެންޓް ލިބިފައިވާ އިރު، 2020ގައި ލިބިފައި ވަނީ 64 ބިލިއަން ޑޮލަރުގެ އިންވެސްޓްމެންޓެވެ. އިންޑިއާގައި ގިނަ ބޭރުގެ އިންވެސްޓްމެންޓްތައް ހިންގާފައި ވަނީ މުވާސަލާތީ ދާއިރާގައެވެ.
ހަމައެކަނި އެމެޒޮންއިންވެސް އިންޑިއާގައި 2.5 ބިލިއަން ޑޮލަރު އިންވެސްޓްކޮށްފައި ވެއެވެ. އިންޑިއާ ވެގެން ގޮސްފައި ވަނީ ދުނިޔޭގެ ފަސްވަނައަށް އެންމެ ގިނައިން އެފްޑީއައި ލިބުނު ގައުމުގެ ގޮތުގައެވެ.
ޗައިނާއަށް ބޭރުގެ އިންވެސްޓްމެންޓްގެ ގޮތުގައި 149 ބިލިއަން ޑޮލަރު ލިބިފައި ވެއެވެ.
