ދުނިޔޭގައި އެންމެ ފުޅާދާއިރާއެއްގައި ސިއްރުން މީހުން ހައްޔަރުކޮށް ގެއްލުވާލާ ގައުމަކީ ޗައިނާކަމަށް އިނގިރޭސި ގާރޑިއަން ނޫހުން މިއަދު ބުނެފިއެވެ. ސޭފްގަރޑް ޑިފެންޑާޒް ކިޔާ ޖަމާއަތަކުން ޝާއިއުކޮށްފައިވާ ރިޕޯޓާ ގަރޑިއަން އިން ހަވާލާދީ ބުނެފައި ވަނީ ކަނޑައެޅިފައިވާ ޚާއްސަ ތަންތަނެއްގައި އެތަކެއް ހާސް މީހުން ބަންދު ކޮށްގެން ޗައިނާއިން ގެންގުޅޭ ކަމަށެވެ.
ލޮކްޑް އަޕްގެ ނަމުން ތައްޔާރުކޮށްފައިވާ މި ރިޕޯޓް ބިނާކޮށްފައިވަނީ ޗައިނާގެ ކޯޓުގެ ގަޒިއްޔާތަކާއި ޑޮކިއުމެންޓްތައް ދިރާސާ ކޮށްގެންނެވެ. 2013ން ފެށިގެން 23 ހާސް މީހުން ބަންދުކޮށްފައިވާ ކަމަށް މި ލިޔުންތަކުން ދައްކައެވެ.
ކުރިން މިތަންތާނގައި ބަންދުކޮށްގެން ގެންގުޅެފައި ދޫކޮށްފައިވާ މީހުން އަތުންވެސް މަޢްލޫމާތު ނެގިކަމަށް ލޮކްޑް އަޕް ރިޕޯޓް ބުނެއެވެ.
މިއަމަލަކީ، މީހުން ވަގަށް ނެގުމުގެ އަމަލެއްކަމަށް ސިފަކުރަމުން ސޭފްގާރޑް ޑިފެންޑާޒް އިން ބުނެފައި ވަނީ ޝަރީއަތަކާ ނުލައި މީހުން އެތައް ޒަމާނަކަށް ބަންދުކޮށްގެން ޗައިނާ ސަލާމަތީ ބާރުތަކުން ގެންގުޅޭ ކަމަށެވެ. ބަންދުކުރާ މީހުންގެ އާއިލާއަށް އެކަން އަންގަން ޖެހޭކަމަށް ގަވާއިދު ބުނާއިރު ފުލުހުން ވެސް އަދި ސަލާމަތީ ފަރާތްކުން ވެސް އެކަމެއް ނުކުރާ ކަމަށެވެ.
މި ރިޕޯޓް ބުނާ ގޮތުން އިންސާނީ ހައްގަށް ވާހަކަ ދައްކާ މީހުންނާއި ނޫސްވެރިންނާއި ބިދޭސިން މިގޮތަށް ބަންދުކޮށްގެން ގެންގުޅެއެވެ. މީގެ ތެރޭގައި ޗައިނާ ދަރިކޮޅުގެ އޮސްޓްރޭލިއާގެ ނޫސްވެރިޔާއާއި ކެނެޑާގެ ދެ ރައްޔިތަކުވެސް ހިމެނޭކަމަށް ބުނެފައި ވެއެވެ. އަދި މިއީ މިފަދަ ފަރާތްތަކާ ދެކޮޅަށް ޗައިނާއިން ހިންގާ ހޮސްޓެޖް ޑިޕްލޮމެސީކަމަށްވެސް ސިފަ ކޮށްފައި ވެއެވެ.
