އިސްލާމް ދީނުގައި ޚިތާން ކުރުން ޝަރްޢު ކުރައްވާފައިވަނީ ހަމައެކަނި ފިރިހެން ކުދިންނަށް ކަމަށް ކުރީގެ ރައީސް އަލް އުސްތާޛު މައުމޫން ޢަބްދުލްޤައްޔޫމް ވިދާޅުވެއްޖެ އެވެ.
އެމަނިކުފާނު ކުރައްވާފައިވާ ޓްވީޓެއްގައި ވިދާޅުވެފައިވަނީ އަންހެންކުދިން ޚިތާން ކުރުމެއް ނޯންނަ ކަމަށާއި ޚިތާން ކުރުމުގެ ނަމުގައި އަންހެން ކުދިންގެ ޖިންސީ ގުނަވަނަށް ގެއްލުން ދިނުމަކީ ލާއިސްލާމީ ނާތަހުޒީބީ ޢަމަލެއް ކަމަށެވެ.
ރައީސް މައުމޫން މިއަދު ކުރެއްވި ޓުވީޓެއްގައި ވިދާޅުވީ، އިސްލާމް ދީނުގައި ހިތާން ކުރުން ޝަރްއު ކުރައްވާފައިވަނީ ހަމައެކަނި ފިރިހެން ކުދިންނަށް ކަމަށާއި އަންހެން ކުދިން ހިތާން ކުރުން ނޯންނަ ކަމަށެވެ.
އަންހެން ކުދިން ހިތާނު ކުރުމުގެ މައުޟޫއާ ގުޅޭ ގޮތުން އަލުން ވާހަކަ ދެކެވެން ފެށީ އެ ސަގާފާތް އަލުން ރާއްޖޭގައި އާލާވަމުން އަންނަކަން ދިރާސާތަކުން ދައްކާފައިވާ ކަމަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) އިން ބުނުމުން ނެވެ.
އެޗްއާރްސީއެމް ކޮމިޝަނަރު ޝިފާތު އަބްދުއްރައްޒާގް ވިދާޅުވީ، ރާއްޖޭގައި އަންހެން ކުދިން ޚިތާނުކުރުމާއި އެކަމަށް ހިތްވަރު ދިނުމުގެ އިތުރުން އެފަދަ ކަންކަން ކުރާ މީހުންވެސް އިތުރުވަމުން އަންނަކަން ދިރާސާތަކުން ދައްކާ ކަމަށެވެ.
އެ ބަހުސް އިތުރަށް ހޫނުވީ ޚިތާނުކުރުމުގެ ފައިދާތަކާ ގުޅޭ ގޮތުން ލިޔެފައިވާ ސުވާލާއި ޖަވާބު ލިޔުމެއް ރާއްޖޭގެ މަޝްހޫރު ދީނީ އިލްމުވެރިޔާ، ޑރ. މުހައްމަދު އިޔާޒު އަބްދުއްލަތީފް ޓުވީޓު ކުރެއްވުމުން ނެވެ. އެ ޓްވީޓު ކުރުމުން ގިނަ ބަޔަކު އަންނަނީ އިޔާޒަށް ފާޑު ކިޔަމުން ނެވެ.
