ދިދަ ނެގުމުގެ ރަސްމިއްޔާތުން ދިވެހި ރައްޔިތުންގެ ޕާޓީ (އެމްޑީޕީ) ގެ އަހަރީ ދުވަހުގެ ހަރަކާތްތައް މާދަމާ ފަށަން ނިންމައިފި އެވެ.
މި ހަރަކާތްތަކާއި ގުޅިގެން އެމްޑީޕީގެ ޗެއަރޕަރސަން އަލް އުސްތާޛު ހަސަން ލަތީފު ވިދާޅުވީ ދިދަ ނެގުމުގެ ރަސްމިއްޔާތު އޮންނާނީ ހޮނިހިރު ދުވަހުގެ ހެނދުނު އެމްޑީޕީ ހަރުގޭގައި ކަމަށެވެ. އަދި އެއަށްފަހު ޤައުމީ މަޖިލީހުގެ ޚާއްސަ ޖަލްސާއަކާއި ކްލަބް ހައުސްގައި “ކްލަބް ހައުސް އެމްޑީޕީ ހަރުގެ” ލޯންޗްކުރުން އޮންނާނެކަމަށެވެ.
އަހަރީ ދުވަހާއި ގުޅުވައިގެން ތަފާތު ގިނަ ހަރަކާތްތަކެއް މުޅި ރާއްޖޭގައި މަހެއްހާއި ދުވަހަށް ހިންގުމަށް ނިންމާފައިވާ އިރު، އަހަރީ ދުވަސް ފާހަގަކުރުމަށް ބާއްވާ ޚާއްސަ ހަރަކާތް އޮންނާނީ ހޮނިހިރު ދުވަހުގެ ރޭ ކަމަށް ވެސް އޭނާ ވިދާޅުވި އެވެ.
މީގެއިތުރުން “ގްރާސް ރޫޓް އަޑު” ގެ ނަމުގައި ފޯން ކޯލްގެ ޒަރިއްޔާއިން ރާއްޖޭގެ ހުރިހާ ރަށެއްގައި ތިބި އެމްޑީޕީގެ އާންމު މެންބަރުންގެ އަޑާއި އެ މެންބަރުން އެކި ކަންކަމުގައި ދެކޭ ގޮތުގެ ޝުޢޫރު ފާޅު ކުރުމުގެ ހަރަކާތެއް 3 ދުވަހަށް ކުރިޔަށް ގެންދިޔުމަށް ނިންމާފައިވާ ކަމަށް ވެސް ހަސަން ލަތީފު ވަނީ ވިދާޅުވެފަ އެވެ.
ޗެއަރޕަރސަން ހަސަން ލަތީފް ވިދާޅުވީ ޖުލައި މަހު ފަހުކޮޅު ބާއްވާ ހަރަކާތްތަކުގައި ޕާޓީގެ ރައީސް، ރައީސް މުހައްމަދު ނަޝީދުވެސް ބައިވެރިވަޑައިގަންނަވާނެ ކަމަށެވެ.
އެމްޑީޕީއަކީ މަލްޓީ ޕާޓީ ސިސްޓަމް ދިވެހިރާއްޖެއަށް ތާއާރަފުކުރެވުނު އިރު، އެންމެ ފުރަތަމަ ރަޖިސްޓްރީ ކުރި ސިޔާސީ ޕާޓީއެވެ. އެ ޕާޓީ އުފެދުނީ، 2005 ވަނަ އަހަރުގެ ޖޫންމަހުގެ 26 ވަނަ ދުވަހު އެވެ.
