ހއ. ދިއްދޫއިން ކޮވިޑު ޖެހިގެން މީހަކު މަރުވެއްޖެ އެވެ.
މަޢުލޫމާތު ލިބިފައިވާ ގޮތުގައި މިއީ އެރަށުގައި ކަރަންޓީނުގައި ހުއްޓައި ކުއްލި ގޮތަކަށް މިއަދު މަރުވި ބިދޭސީ އެކެވެ.
ހއ. އަތޮޅު ހޮސްޕިޓަލުން ބުނީ ބަލީގެ އަލާމާތްތައް ހުރެގެން އޭނާގެ ސާމްޕަލް ނަގާފައިވަނީ އިއްޔެ ކަމަށެވެ. އަދި މިއަދު މަރުވި ފަހުން ނަތީޖާ ލިބުނު އިރު ޕޮޒިޓިވް ކަމަށެވެ.
އެމީހާއަކީ ޕޮޒިޓިވްވި މީހަކާ ގާތުން ދިމާވެގެން ކަރަންޓީނުކޮށްފައި ހުރި ބިދޭސީއެއް ކަމަށް ވެސް އެ ހޮސްޕިޓަލުން ބުނެ އެވެ.
"ޚަބަރު ހުސްވެގެން މިއަދު މެންދުރެއްހާއިރު ހޮސްޕިޓަލަށް ގެނައީ. ގެނައި އިރުވެސް މަރުވެފަ އޮތީ. އެމީހާއަކީ މި ރަށުގައި ހުންނަ ފަހާތަނެއްގައި މަސައްކަތް ކުރާ މީހެއް." ދިއްދޫ އިން މަޢުލޫމާތު ދިނެވެ.
އޭނާ ކޮވިޑަށް ޕޮޒިޓިވްވުމާ ގުޅިގެން މި މަހުގެ 15 ވަނަ ދުވަހުން ފެށިގެން އެތަނަށް ދިޔަ މީހުންގެ މައުލޫމާތު ކޮންޓެކްޓް ޓްރޭސިންގ ގްރޫޕަށް ހިއްސާ ކުރުމަށް ހޮސްޕިޓަލުން ވަނީ އެދިފަ އެވެ.
މި މަރާއެކު ބަލީގައި ރާއްޖެއިން މަރުވި މީހުންގެ އަދަދު ވަނީ 209 އަށް އަރާފަ އެވެ.
