ރާއްޖޭގެ މުވާސަލާތީ އެންމެބޮޑު ކުންފުނި، ދިރާގުން މޯލްޑިވްސް ތެލެސީމިއާ ސޮސައިޓީއަށް ރޯދަ ޑޭޓާ ބަންޑަލް އިން ލިބުނު 313,235 ރުފިޔާ ހަދިޔާކޮށްފި އެވެ.
މިއީ ދިރާގުން މިއަހަރުގެ ރޯދަ މަހާއި ފިތްރު ޢީދަށް ޚާއްސަކޮށްގެން ތައާރަފުކުރި ޚާއްސަ ޑޭޓާ ބަންޑަލްތައް ކަސްޓަމަރުން އެކްޓިވޭޓް ކުރައްވައިގެން ލިބުނު ފައިސާގެ %10 އެވެ.
އެގޮތުން މި އަހަރުގެ މި ޑޭޓާ ބަންޑަލް ތަކުން ލިބުނު ރުފިޔާ ހަވާލުކޮށްފައިވަނީ މިއަދު ދިރާގު ހެޑް އޮފީހުގަ އެވެ.
މޯލްޑިވިއަން ތެލެސީމިއާ ސޮސައިޓީގެ ޗެއަރޕަރސަން ޖީހާން ސަލީމް ވިދާޅުވީ "ދިރާގަކީ ދިވެހި ކުންފުނިތަކުގެ ތެރެއިން އަޅުގަނޑުމެންނަށް އެންމެ ކުރިންސުރެ ވެސް އެހީތެރިވަމުން އަންނަ އެއް ކުންފުނި." ކަމަށެވެ. އަދި "ވޭތުވެ ދިޔަ އަހަރު ތަކުގެތެރޭ ދިރާގުގެ ފަރާތުން އެކި ގޮތްގޮތުން އަޅުގަނޑުމެންނަށް ލިބުނު އެހީތެރިކަމުގެ ސަބަބުން ގިނަ ގުނަ ފައިދާއާއި ކުރިއެރުން އަޅުގަނޑުމެންނަށް ވަނީ ލިބިފައި." ކަމަށެވެ.
އެހެންކަމުން އެ ސޮސައިޓީގެ ޕޭޝަންޓުންނާއި ބެލެނިވެރިންގެ ފަރާތުން ދިރާގަށް ވަރަށް ބޮޑަށް ޝުކުރު ދަންނަވާ ކަމަށް އޭނާ ވިދާޅުވި އެވެ.
ދިރާގުން ވަނީ ވާއިތުވި އަހަރުތަކުގައިވެސް އެކި ޖަމިއްޔާތައް ދިރާގު ރޯދަ ޑޭޓާ ބަންޑަލްތަކުން ލިބުނު ފައިސާގެ %10 ހަދިޔާ ކޮށްފަ އެވެ.
އެގޮތުން ޓައިނީ ހަރޓްސް އޮފް ދަ މޯލްޑިވްސް އަދި މޯލްޑިވްސް އެސޯސިއޭޝަން އޮފް ޕަސަންސް ވިތް ޑިސްއެބިލިޓީސް (އެމްއޭޕީޑީ) ހިމެނެ އެވެ.
