ހެލްތު މިނިސްޓަރ އަހްމަދު ނަސީމު ތ. އަތޮޅަށް ވަޑައިގެންފި އެެވެ.
މި މަހުގެ 1 ވަނަ ދުވަހުން 4 ވަނަ ދުވަހުގެ ނިޔަލަަށް ކުރައްވާ މި ދަތުރުފުޅުގައި އެ އަތޮޅުގެ ގިނަ ރަށްތަކަށް ވަޑައިގަތުމަށް ވަނީ ނިންމާފަ އެވެ.
އެގޮތުން ތިމަރަފުށި، ވޭމަންޑޫ، ގާދިއްފުއްޓަށާއި އަދިވެސް އެހެން ރަށްރަށަށް ވަޑައިގަތުމަށް ނިންމާފައިވާ އިރު، މިއަދު ވަނީ ތ. މަޑިފުށި ހެލްތު ސެންޓަރަށް ވަޑައިގެން އެތަނުގެ މުވައްޒަފުންނާއި ބައްދަލުކުރައްވާފަ އެވެ.
ހެލްތު މިނިސްޓަރުގެ މި ދަތުރުފުޅުތަކުގައި އެ ރަށްރަށުގެ ސިއްހީ މަރުކަޒުތަކަށް ޒިޔާރަތްކޮށް ރަށްރަށުގެ ކައުންސިލްތަކާއި ބައްދަލުކުރެއްވުމަށް ވެސް ވަނީ ހަމަޖެހިފަ އެވެ.
އަތޮޅުތެރޭގެ ސިއްހީ ނިޒާމް ހަރުދަނާކުރުމަށް ސަރުކާރުން ގިނަ މަސައްކަތްތަކެއް ކުރަމުން އަންނަ އިރު، ރަށްރަށުގެ ހެލްތު ސެންޓަރުތަކާއި އަތޮޅު ހޮސްޕިޓަލްތަކުން ދެމުން އަންނަ ޚިދުމަތްތަކާއި އެތަންތަނުގައި މަސައްކަތްކުރާ މުވައްޒަފުންގެ ފެންވަރު ރަނގަޅު ކުރުމަށް ވެސް ސަރުކާރުން އަންނަނީ ގިނަ މަސައްކަތްތަކެއް ކުރަމުން ނެވެ.
މިނިސްޓަރ ނަސީމުގެ އަރިހުގައި މި ދަތުރުފުޅުގައި ހެލްތު މިނިސްޓްރީގެ ސްޓޭޓް މިނިސްޓަރ އަހްމަދު އާދިލް އާއި، ސިނިއަރ އެގްޒެކެޓިވް ޑިރެކްޓަރ އަބްދުﷲ ހަންނާން އާއި، އެސިސްޓެންޓް ޑިރެކްޓަރ އަބްދުﷲ މައުރޫފް އަދި މިނިސްޓްރީގެ އިސް މުވައްޒަފުން ވަނީ ބައިވެރިވެވަޑައިގެންފަ އެވެ.
