އިންޑިއާއިން އެކްސްޕޯޓްކޮށްފައިވާ ހަވާދާއި ދަނޑުވެރިކަމުގެ ބާވަތްތައް ހަތަރު ބިލިއަން ޑޮލަރަށް އެރުމުން މި އަދަދު ފަސް ބިލިއަން ޑޮލަރަށް ހަމަކުރުމަށް މަސައްކަތް ކުރާކަމަށް އިންޑިއާއިން ބުނެއެވެ. ކޮވިޑްގެ ހާލަތުގައި އިންޑިއާއިން ހަތަރު ބިލިއަން ޑޮލަރު މި ދާއިރގެ އެކްސްޕޯޓުން ހޯދާފައިވާނަމަ، އިތުރު މަސައްކަތުން އަދި އެއް ބިލިއަން ހަމަ ކުރެވިދާނެ ކަމަށް ދައްކައެވެ.
އިންޑިއާގެ ދަނޑުވެރިކަމުގެ އުފެއްދުމުގެ ދިހަ ބާވަތެއްގެ އެކްސްޕޯޓު މިދިޔަ އެތައް އަހަރެއްގެ ތެރޭގައި ވަނީ އިތުރުވާން ފަށާފައެވެ.
ކޮވިޑްގެ ހާލަތުގައިވެސް ޔޫރަޕްގެ ޖަމާއަތަށާއި ދެކުނު އިރުމަތީ އޭޝިއާއަށް އިންޑިއާއިން އެކްސްޕޯޓް ކޮށްފައިވާ ހަވާދާއި ދަނޑުވެރި ކަމުގެ ބާވަތްތައް ވަނީ އިތުރު ވެފައެވެ.
އިންޑިއާގައި އުފައްދާ ހަވާދުގެ ބާވަތްތަކުގެ 14އާއި 15 ޕަސެންޓް އެކްސްޕޯޓު ކުރާއިރު ދެންހުރި ބާވަތްތައް އިންޑިއާއިން އަމިއްލައަށް ބޭނުން ކުރެއެވެ.
އިންޑިއާގެ ކޮމާސް މިނިސްޓްރީން ބުނާ ގޮތުގައި މިއަހަރަކީ ކަޝްމީރުގެ ޒައުފަރާން ވިއްކައިގެން އިންޑިއާއަށް އެންމެ ގިނައިން ފައިސާ ލިބުނު އަހަރެވެ. އިންޑިއާ ޒައުފަރާންގެ ކިލޯއެއްގެ އެކްސްޕޯޓް އަގަކީ 3.2 ލައްކަ ރުޕީސް އެވެ.
