އިންޑިއާގެ ބެޓެރި ސައިކަލް އުފައްދާ އޯލާ އިލެކްޓްރިކްގެ އެންމެ ފުރަތަމަ ސައިކަލް އިއްޔެ އެކުންފުނިން އާންމުކޮށް ދައްކާލައިފިއެވެ. މިއީ ޓެމިލްނާޑޫގައި އޯލާ އިލެކްޓްރިކްއިން ހަދާފައިވާ ފިއުޗަރފެކްޓްރީން އުފައްދާފައިވާ ސައިކަލެކެވެ.
މި ފެކްޓްރީގައި އަހަރަކު 10 މިލިއަން ސައިކަލް އުފެއްދުމަށް އޯލާއިން އަމާޒު ހިފާފައި ވެއެވެ. މި ލަނޑުދަނޑި އޯލާއަށް ޙާސިލުކުރެވިއްޖެނަމަ، އެ ކުންފުންޏަށް އަހަރަކު އެ އުފެއްދެނީ ދުނިޔޭގެ ޖުމުލަ ސައިކަލު އުފެއްދުމުގެ 15 އިންސައްތައެވެ.
ބެޓެރިން ޗާޖުކޮށްގެން ދުއްވާ އޯލާ ސައިކަލްގެ އުފައްދާފައިވާ ފުރަތަމަ އާއިލާއަކީ އެސް1 އެވެ. އޯލާގެ އިލެކްޓްރިކް ސައިކަލް ގަތުމަށް ރެޖިސްޓްރީ ކުރުމަށް ވަނީ ހުޅުވާލާފައެވެ. 500 ރުޕީސްއަށް ރެޖިސްޓްރީ ވެވެއެވެ. މިވައްތަރުގެ ސައިކަލުގެ އަގު އެއްލައްކަ އިންޑިއާ ރުޕީސްއަށް އަރާނެ ކަމަށް ވެއެވެ.
އޯލާއިން ބުނާ ގޮތުން އެކުންފުނިން ބެޓެރި ކާރުވެސް އުފައްދާނެއެވެ. އިންޑިއާއިން އަމާޒު ހިފާފައި ވަނީ ތިމާވެށްޓާ ރަޙުމަތްތެރި އުޅަނދުތައް ބޭނުންކުރުން އިތުރު ކުރާށެވެ. މިނިވަން 75ގައި ވާހަކަ ދައްކަވަމުން އިންޑިއާގެ ބޮޑު ވަޒީރު ނަރެންދްރާ މޮދީ އިއްޔެ ވިދޅުވީ އިންޑިއާއިން ފަށާނެ ޚާއްސަ ޕްރޮޖެކްޓަކީ ހައިޑްރޮޖަން އުފައްދައި ދުނިޔެއަށް ވިއްކުމުގެ ވިޔަފާރިއެވެ. މިއީ ސާފު ހަކަތައިގެ ވަސީލަތެއްގެ ގޮތުގައި މުސްތަގްބަލުގައި ބޭނުން ކުރާނެ ވަސީލަތެވެ.
އިންޑިއާގެ ޒުވާން ސާދާގަރު ބަހަވީޝް އަގަރްވާލްގެ އޯލާ ކުންފުންޏަކީ، ޓެކްސީ ދަތުރުތަކުގައި މީހުން ހިއްސާވާ ކުލީ ކާރުގެ ވިޔަފާރިން ފެށި މީހެކެވެ. ނެދަރލެންޑްގެ ބެޓެރި ސައިކަލް ޑިޒައިންކޮށް އުފައްދާ ކުންފުންޏެއް ގަނެގެން އެކުންފުނީގެ އުފެއްދުން އިންޑިއާއަށް ބަދަލުކޮށް އޭނާ ބެޓެރި ސައިކަލް އުފެއްދުމަށް މަސައްކަތް ފެށިތާ މިހާރު އަހަރެއްވީއެވެ.
