އަފްޣާނިސްތާންގައި ގޮތް ހުސްވެފައިވާ އެމެރިކާއިން ބުނަނީ، ތާލިބާނުން އަފްޣާން ރައްޔިތުންގެ އަސާސީ ހައްގު ކަށަވަރު ކޮށްދޭނެ ކަމުގެ ޔަގީން ދީފިނަމަ ޓެރަރިސްޓް ޖަމާއަތުގެ ސަރުކާރު ގަބޫލުކޮށްފާނެ ކަމަށެވެ. އަދި ނިރުބަވެރިކަމުން އަފްޣާނިސްތާން ދުރުކުރުމަށްވެސް އެމެރިކާއިން ޝަރުތު ކުރެއެވެ.
އެމެރިކާގެ ސިޔާސަތަށް ބަދަލެއް އައިސްފައި މިވަނީ، ޗައިނާއިން ތާލިބާންގެ ސަރުކާރު ގަބޫލުކޮށްފާނެކަމަށް ބުނާ ރިޕޯޓްތައް އާންމު ވެގެން އެކަމާ ގުޅިގެން އެމެރިކާގެ ޚާރިޖީ ވަޒީރަށް ސުއާލު ދެންނެވުމުންނެވެ.
އެމެރިކާއިން އަފްޣާނިސްތާންގައި ހޭދަ ކުރި 20 އަހަރުގެ ދުވަހު ދުވަސްތައް ބޭކާރުކޮށްލީ ކަމަށް ބުނެ މީހުން ދަނީ އެމެރިކާއަށް ފާޑު ކިޔަމުންނެވެ. އަދި މި މުއްދަތުގައި އަފްޣާން ސިފައިންނާއި ފުލުހުން އެދެވޭ ގޮތަކަށް ތަމްރީން ކުރުމަށް އެމެރިކާއިން މަސައްކަތް ނުކުރާކަމަށްވެސް ބުނެއެވެ.
އެމެރިކާއިން އަފްޣާނިސްތާނުން ބޭރުވެގެން ދިޔަ ކަމަށް ބުނެ، އިއްޔެ ފެނިގެން ދިޔަ މަންޒަރުތަކަކީ، ވިއެޓްނާމްގެ ސައިގަންގައި އެމެރިކާގެ އެމްބަސީގެ ފުރާޅުމަތިން ޑިޕްލޮމޭޓުންގެ ފޮށިތަންމައްޗާއެކު ހެކޮޕްޓަރުގައި ފިލައިގެން ދިޔަ މަންޒަރާ ދާދި އެއްގޮތް މަންޒަރެކެވެ.
އެމެރިކާގެ ރައީސަށް ދުވަސްކޮޅެއް ކުރިން ދެންނެވި ސުއާލެއްގައި ކާބުލްގައި އޮތް އަފްޣާނިސްތާން ސަރުކާރު ވެއްޓިދާނެތޯ ސުއާލު ދެންނެވުމުން ބައިޑެން ވިދާޅުވީ އަޝްރަފް ޣަނީގެ ސަރުކާރެއް ނުވެއްޓޭނެ ކަމަށެވެ.
އެމެރިކާއިން ބުނަނީ އަފްޣާނިސްތާންގައި އެމީހުން ކާމިޔާބީ ހޯދީ ކަމަށެވެ. ނަމަވެސް ދުނިޔެއިން ގަބޫލުކުރަނީ އެމެރިކާއިން އަފްޣާނިސްތާނުން ބޭރުކޮށްލީ ވެލިކާންދީފައި ކަމަށެވެ.
