އަފްޣާނިސްތާންގެ ވެރިރަށަށް ތާލިބާނުން ވަނުމުގެ ކުރިން ތާލިބާނުންގެ ވިސްނުން ދުނިޔެއާ ޙިއްސާ ކޮށްދެއްވީ ޕާކިސްތާންގެ ބޮޑު ވަޒީރު އިމްރާން ޚާނެވެ. ޚާން ވިދާޅުވީ އަފްޣާންގެ އިންތިޚާބީ ރައީސް އަޝްރަފް ޣަނީ އެމަގާމުގައި ހުންނެވިހައި ދުވަހަކު ތާލިބާނުން އޭނާއާ ސުލްހައިގެ ވާހަކަތައް ނުބާއްވާނެ ކަމަށެވެ.
އެއަށްފަހު ވެގެން ދިޔަ ކަމެއް ވެގެން ދިޔައީ އެވެ. ތާލިބާނުން ކާބުލްއަށް ވަން އިރު ރައީސް އަޝްރަފް އަބްދުލް ޣަނީ ވަނީ ގައުމު ދޫކުރައްވައި ބޭރަށް ވަޑައިގެންފައެވެ. އޭނާ ވަޑައިގަތީ ކޮންތާކަށް ކަމެއް އަދިއެއް ނޭނގެއެވެ.
އިއްޔެގެ ރިޕޯޓްތަކުގައި ތާޖިކިސްތާނަށް އޭނާވަޑައިގަތް ކަމަށް ބުނިނަމަވެސް އެގައުމުން މިއަދު ވަނީ އެވާހަކަ ދޮގުކޮށްފައެވެ. މިއަދު ރަޝިޔާއިން ބުނެފައި ވަނީ ޣަނީ ވަޑައިގަތީ ހެލިކޮޕްޓަރާއި ކާރުތަކަކާއި ގިނަ އަދަދެއްގެ ފައިސާއާއެކު އެވެ. ނަމަވެސް މިޖުމަލައަށް ވުރެން އިތުރު ތަފްސީލެއް ރަޝިޔާއިންވެސް ހާމަކޮށްފައެއް ނުވެއެވެ.
ތާލިބާނަކީ ޕާކިސްތާންގެ އުފެއްދުމެއްކަން ކުރިންވެސް އެނގެއެވެ. ތާލިބާނުން ސުލްޙައާ މެދު ވިސްނާ ގޮތް ޕާކިސްތާން ބޮޑު ވަޒީރު ހާމަ ކުރެއްވުމުން މިމީހުންގެ ސިކުނޑިއަށް ޕާކިސްތާނަށް ފީނައިގަނެވޭކަން ވަރަށް ސާފެވެ. ޚާން ވިދާޅުވިކަމަށް ޑޯން ނޫހުގައި ލިޔެފައި ވަނީ، ތާލިބާނުން ޕާކިސްތާނަށް ކުރި ދަތުރުގައި މަޝްވަރާކުރުމަށް ބާރުއެޅި ކަމަށެވެ. ނަމަވެސް އެމީހުން ވަނީ ޕާކިސްތާނާއެކު ސާފުބަހުން އެމީހުންގެ އެދުންތައް ހާމަކޮށްފައެވެ. ތާލިބާނުން ބުނެފައި ވަނީ ޣަނީއާއި އޭނާގެ ސަރުކާރަކީ އެމެރިކާގެ ގޮނޑިކޮއްކޮ ސަރުކާރެއް ކަމަށެވެ. އަދި ދޯޙާގެ މަޝްވަރާތައްވެސް ކުރިއަށް ނުދަނީ އެހެންވެގެން ކަމަށެވެ.
ބިދޭސި ނޫސްވެރިން ޚާނަށް ސުއާލު ދެންނެވީ، ކުލީ ހަނގުރާމަވެރިން ތާލިބާނާއެކު ހަނގުރާމަ ކުރާ ކަމަށާއި އޭގެ ތެރޭގައި ގިނަ އަދަދަކަށް ޕާކިސްތާން މީހުންވެސް ހިމެނެނީ ކީއްވެގެން ތޯއެވެ. މީގެ ރައްދުގައި ޚާން ވިދާޅުވީ މިވާހަކަތަކަކީ، ޕާކިސްތާނާ ދެކޮޅަށް ދައްކާ ޕްރޮޕެގެންޑާ ވާހަކަތަކެއް ކަމަށެވެ.
ތާލިބާނުގެ ސަޕްލައިތައް އަންނަނީ ޕާކިސްތާނުންނެވެ.
ނޫސްވެރިންނާ ވާހަކަ ދައްކަވަމުން ޚާން ވިދާޅުވީ ޕާކިސްތާން އަފްޣާން ސަރަހައްދުގައި ކޭމްޕްތަކުގައި އެއް ލައްކައެއްހައި މީހުން ދިރިއުޅޭ ކަމަށާއި މި ތަންތާނގައި ތާލިބާނުން ދިރިއުޅޭ ނަމަ އެމީހުން ހޯދައިގަތުމަކީ ޕާކިސްތާނަށް ފަސޭހަކަމަކަށް ނުވާނެ ކަމަށެވެ.
ޚާން ވިދާޅުވީ ތާލިބާނާ ދެކޮޅަށް ފިޔަވަޅު އެޅުމަށް އެމެރިކާއާއި އެހެން ފަރާތްތަކުން ޕާކިސްތާނަށް ފިއްތުންތައް ކުރިމަތި ކުރަމުންދާ ކަމަށެވެ. އަދި ސުލްހައިގެ މޭޒުދޮށަށް ތާލިބާނުން ގެނައުމަށް ޕާކިސްތާނުން މަސައްކަތް ކުރިވަރަށް އެއްވެސް ބަޔަކު މަސައްކަތް ކޮށްފައި ނުވާނޭ ކަމުގައި ޚާން ވިދާޅުވިއެވެ.
ނޫސްވެރިންނާ ވާހަކަ ދައްކަވަމުން ޚާން ވަނީ، އެމެރިކާއަށް ފާޑު ވިދާޅުވެފައެވެ. އެމެރިކާގެ ރައީސް އަދިވެސް އިމްރާން ޚާނަށް ފޯނުން ގުޅުއްވާފައެއް ނުވެއެވެ.
"އަޅުގަނޑަށް ހީވަނީ އެމެރިކާގެ ސްޓްރެޓެޖިކް ބައިވެރިޔާއަކީ މިހާރު އިންޑިއާ ހެން. ޕާކިސްތާނާ މެދު އެމެރިކާއިން ތަފާތު ކުރަނީ އެސަބަބާ ލައިގެން ކަމަށް އަޅުގަނޑު ދެކެނީ" އޭނާ ވިދާޅުވިއެވެ.
ޖޯ ބައިޑެން މަގާމާ ޙަވާލުވެވަޑައިގެން މިއަދާ ހަމައަށްވެސް އިމްރާން ޚާނަށް ގުޅުއްވާފައި ނުވާތީ ޕާކިސްތާނުން ވަނީ އެކަމާ މެދު ނުރުހުން ފާޅުކޮށްފައެވެ.
ފައިނޭންޝަލް ޓައިމްސްއާ ވާހަކަ ދައްކަވަމުން ޕާކިސްތާންގެ ގައުމީ ސަލާމަތާ ބެހޭ މުޝީރު މުޢީދު ޔޫސުފް ވިދާޅުވިގޮތުގައި އެމެރިކާއިން ޕާކިސްތާނާ އަޅާނުލައި އުޅެނީނަމަ ޕާކިސްތާނަށް އެހެން ގޮތްތައްވެސް އޮންނާނެއެވެ.
އަފްޣާނިސްތާންގައި ތާލިބާނުން ކުރި ހޯދަމުން ދިޔައިރު، މީހުން ވަނީ މީސްމީޑިއާގައި ޕާކިސްތާނާ ދެކޮޅު ޝުއޫރުތައް ފާޅުކޮށްފައެވެ. ޕާކިސްތާނާ ދެކޮޅަށް ދަތިކުރުމުގެ ފިޔަވަޅު އެޅުމަށް ގޮވާލާ ހޭޝްޓެގް އޮތީ ވައިރަލް ވެގެން ގޮސްފައެވެ.
