އިންޑިއަން ސަބްކޮންޓިނެންޓްގެ އެންމެ ބޮޑު ދެ ގައުމުން މިނިވަންކަން ފާހަގަ ކުރާ އިރު ދެކުނު އޭޝިއާގެ ޖަމާއަތަށް އެންމެ ފަހުން ބައިވެރިވި ގައުމު އަފްޣާނިސްތާން ހަމަނުޖެހުމެއްގެ ތެރެއަށް ވެއްޓިގެން ދިޔައީއެވެ. މުޅި ދެކުނު އޭޝިއާއަށް ބަލާލިކަމުގައި ވިއަސް ހަރުކަށިކަމާއި ހައްދުފަހަނައަޅައި ދިއުން އޮތީ ފެންނާށެވެ. ބައިމަދު މީހުންގެ ހައްގުތަކަށް އިޙުތިރާމު ނުކުރުމުގެ ސަގާފަތަކާއި ގޮތް ދޫނުކުރުމުގެ ހަމަތަކެއް ދަނީ އަށަގަންނަމުންނެވެ.
ޕާކިސްތާންގެ ލިޔުންތެރިޔާ ކަންވަރު ޚަލްދޫން ޝާހިދު ލިޔުއްވާ ގޮތުގައި ޕާކިސްތާނުންވެސް ފެންނާން ހުރީ ވަރަށް ހިތްދަތި މަންޒަރުތަކެވެ. ދާދި އިހަށް ދުވަހު ހިނގި ހާދިސާއެއްގެ ވާހަކަ ކިޔައި ދެއްވަމުން އޭނާ ވިދާޅުވީ، ޕާކިސްތާންގައި ފާސްކޮށްފައިވާ ދީނަށް ފުރައްސާ ކުރާ މީހުންގެ ޝަރީއަތް ކުރާ ގާނޫނުގެ ޝިކާރައަކަށްވި އެންމެ އުމުރުން ހަގު މީހަކީ އުމުރުން އަށް އަހަރުގެ ހިންދީ ދީނުގެ ސޮރެކެވެ.
މިސޮރުގެ ކުށަކީ، ދީނީ ތައުލީމު ދޭ މަދަރުސާއެއްގެ އިމުގެ ތެރެއަށް ކުޑަކަމު ދިއުމެވެ. ހީސް ލުމުގެ ތުހުމަތުގައި މިސޮރު ބަންދުކޮށްގެން ގެންގުޅުމަށްފަހު، މިހާރު ކަފާލާތށް ދޫކޮށްލާފައި ވެއެވެ. ނަމަވެސް މި ކަމުގެ ބަދަލެއްގެ ގޮތުގައި ތަކުބީރު ކިޔަމުން ދިޔަ ބަޔަކު ވަނީ ހިސާބުގެ ހިންދީންގެ ފައްޅި ތަޅާލާފައެވެ.
ޚަލްދޫން ޝާހިދު ލިޔުއްވާ ގޮތުގައި މި ހާދިސާއަށްފަހު ޖެހިގެން އައި ބުރާސްފަތި ދުވަހު އެބޮޓްއާބާދުގައި ޚުންސާ ހިޖުޅާއެއް ހައްޔަރުކުރީ ކީރިތި ޤުރުއާން އަންދާލި ކަމުގެ ތުހުމަތުގައެވެ. މިއީވެއެސް ތެދުދޮގު ކަށަވަރު ނުވާ މައްސަލައެކެވެ.
ޕާކިސްތާންގައި ދީނަށް ފުރައްސާރަ ކުރުމުގެ ގާނޫނުގެ ދަށުން މަރުގެ ސަޒާ އިއްވެއެވެ. އަރަބި އަކުރުން ލިޔެފައި ހުންނަ ފޮޓޯ ފްރޭމެއް މުސްލިމު ނޫން މީހަކު ނަގައި އެހެން ތަނަކަށް ބަދަލުކޮށްފިނަމަ އެވެސް ހިމެނެނީ ދީނަށް ފުރައްސާރަ ކުރާ ބްލާސްފަމީ ލޯގެ އިމުގެ ތެރޭގައެވެ. ހިސާބުގަނޑު މީހުން ހަސްފަތާލުގެ ދޮރު ވައްޓާލައި ވަދެ، ނަރުހަކު ދޮވެލީ، މިފަދަ ހާދިސާއެއްގައެވެ. އަރަބިން ލިޔެފައި ހުރި ފްރޭމް ނަގަން އެންގީ މުސްލިމު ސީނިއާ ނަރުހެކެވެ.
މިފަދަ ހާދިސާތަކުން ފެންނަނީ ދީނަށް ފުރައްސާރަ ކުރުމުގެ ކުށަށް އަދަބު ދިނުމަށް ހަދާފައިވާ ގާނޫނުގެ ބާރެވެ. ވާން ކޮށްލެވޭ، ދެމޭ ރަބަރެއް ފަދައިން ނިކަން ފަސޭހައިން ފުޅާކޮށް ލެވޭ ގާނޫނެކެވެ.
ރައްޔިތުންގެ ހައްގަށްޓަކައި ދީނަށް ނުބަލައި މީހުން ހަމަހަމަކުރުމަށް ގޮވާލުމަކީވެސް މި ގާނޫނުގެ އިމުގެ ތެރޭން ދީނަށް ފުރައްސާރަ ކުރުމެކެވެ.
ޚަލްދޫން ޝާހިދު ލިޔުއްވާ ގޮތުގައި ގާދިޔާނީ އަހުމަދީއަކު ތިމަންނާއަކީ މުސްލިމެކޭ ބުނުމަކީވެސް ޕާކިސްތާންގެ ގާނޫނުގެ ދަށުން ދީނަށް ފުރައްސާރަ ކުރުމެކެވެ. މިސްރުގެ މުފްތީ ދެއްވަނީ މިއާ މުޅިންވެސް ދެކޮޅު ފަތުވާއެކެވެ. އެހެންވީރު ޕާކިސްތާނުގައި އެއްކަމަކަށް މީހާގެ ލޭ ހުއްދަ ވާއިރު މުސްލިމު މިސްރުގައި އެއީ ލޭ ހުއްދަ ކަމެއް ނޫނެވެ.
ޕާކިސްތާންގައި ޚުންސާ ހިޖުޅާއިންނަށް ޖަމާއަތުގައި ހައިސިއްޔަތެއް ދިނުމަށް އިމްރާން ޚާންގެ ސަރުކާރުން މަސައްކަތްތަކެއް ވަނީ ފަށާފައެވެ. އެމީހުންނަށް މަސައްކަތް ދަސްކޮށްދެވެއެވެ. އަދި ސަރުކާރުން އެމީހުންނަށް ޕެންޝަނެއް ވެސް ދެއެވެ. އެކަމަކުވެސް މިއީ މުޖުތަމައުގައި އެންމެ ބޮޑަށް ބާކީ ކުރެވޭ މީހުންނެވެ.
ކާބުލް ހިފުމަށްފަހު ތާލިބާނުން ވަނީ ސިކުންނާއި ހިންދީންނާ ބައްދަލުކޮށް އެމީހުންނަށް ތާލިބާނުންގެ ފުށުން ފުރައްސާރައާ ކުރިމަތިލާން ނުޖެހޭނެ ކަމަށް ބުނެފައެވެ. ހަރުކަށި ހައްދު ފަހައަޅައިދިއުމަށް މޫލާފައިވާ ބަޔެއްގެ ފުށުން އޮތީ ކޮން ގެރެންޓީއެއް ހެއްޔެވެ.
އިންޑިއާގައިވެސް މިފަދަ ކުލަވަރަކީ އާންމު ކަމެކެވެ. ގެރި ކަތިލާކަމަށް ތުހުމަތުކޮށް ޔޫޕީގައި ކިތައް މުސްލިމުންގެ ލޭ ހުއްދަ ކުރެވިފައި ވޭ ހެއްޔެވެ؟ އަދި ހިންދީ ދޭވަތާއިންނަށް ގޮވަން މަޖުބޫރުކޮށްފައި ވަނީ ކިތައް މުސްލިމުންނަށް ހެއްޔެވެ؟
ސަބްކޮންޓިނެޓްގެ މިނިވަން 75 އިޙުތިފާލު ކުރާއިރު އެންމެ ބޮޑަށް ބޭނުންވެފައި ވަނީ މައާފު ކުރުމާއި އެއްކޮށްއުޅުމުގެ ސަގާފަތެއްގެ ޙިކުމަތްތެރިކަން މީހުންގެ ކިބައިގައި އަށަގެންނެވުމަށް މަސައްކަތް ކުރުމެވެ.
