ކުރިއަށް އޮތް ހަތަރު އަހަރުގެ ތެރޭގައި އިންޑިއާއިން ބަޖެޓަށް އެތައް ބިލިއަން ޑޮލަރު ހޯދުމަށްޓަކައި، ހަރުމުދާ ވިއްކަން ނިންމައިފިއެވެ. މިއީ 2021/22ގެ ބަޖެޓު ފާސްކުރިއިރު، އިންޑިއާއިން ނިންމާފައިވާ ކަމެއް ނޫނެވެ. މީގެ މަގްސަދަކީ އޭޝިއާގެ ތިންވަނައަށް އެންމެ ބޮޑު އިގްތިސާދަށް ދިރުމެއްދީ، އުމުރާނީ ތަރައްގީއަށް ބޭނުންވާ ފައިސާ ހޯދުމެވެ.
އިންޑިއާ ސަރުކާރުން ވިއްކަން ނިންމާފައިވާ ހަރު މުދަލުގެ ތެރޭގައި ހިމެނެނީ، ގޭސް ހޮޅިތަކާއި މަގާއި ރޭލު ސްޓޭޝަންތަކާއި ގުދަންފަދަ ތަންތަނެވެ. މިތަންތަން ވިއްކުމުގެ މާނައަކީ ވަރަށް ދިގު މުއްދަތަކަށް މިތަންތަން ކުއްޔަށް ދިނުމެވެ.
ފައިސާ ހޯދުމަށް ހުށަހަޅާފައި ވަނީ މައިގަނޑު ފަސް ދާއިރާއެކެވެ. އޭގެ ތެރޭގައި ހިމެނެނީ، މުވާސަލާތީ ވިއުގައާއި އެއަރޕޯޓްތަކާއި މަގާއި ރޭލްވޭއާއި އިންޖީނުގެތަކާއި ތެޔޮ ކުންފުނިތަކާއި ގޭސް ހޮޅިތަކެވެ.
އިންޑިއާއިން ލަފާ ކުރަނީ ހިނގަމުން މިދާ މާލީއަހަރުގައި 880 ބިލިއަން ރުޕީސް ލިބޭނެ ކަމަށެވެ.
އިންޑިއާގެ ބޮޑު ވަޒީރު ވަނީ ސަރުކާރުގެ މުދާތައް ވިއްކާލާނެ ކަމަށް އިޢުލާން ކުރައްވާފައެވެ. ނަމަވެސް ކޮރޯނާއާ ގުޅިގެން ސަރުކާރުގެ މަސައްކަތްތައް މަޑުޖެހުމުގެ ސަބަބުން މިކަންވެސް އިޢުލާން ނުކޮށް ލަސްވެގެން ދިޔައީއެވެ.
އިންޑިއާ ސަރުކާރުން އިއުލާން ކޮށްފައިވަނީ ލައިފް އިންޝޫރެންސް ކޯޕަރޭޝަން އޮފް އިންޑިއާއާއި ބާރަތު ޕެޓްރޯލިއަމްއާއި އެއަރ އިންޑިއާ މިއަހަރުގެ ތެރޭގައި ވިއްކާލާނެ ކަމަށވެ.
މިދިޔަ މާލީ އަހަރު ބަޖެޓް ދަރަނިވުން އުޅުނީ 9.3 އިންސއްތައިގައި ކަމުން މިފައިސާ އިންޑިއާއަށް ވަރަށް މުހިންމެވެ. އިންޑިއާގެ އަމާޒަކީ އިގްތިސާދީ ދުވެލި 10.5 އިންސައްތައިގައި ހިފެހެއްޓުމެވެ.
