އިންޑިއާއިން ފައިސާ ދައްކާފައިވާ، ދުނިޔޭގެ އެންމެ ކުރިއަރާފައިވާ މިސައިލްގެ ދިފާއީ އައްޑަނަ އިންޑިއާއަށް މިއަހަރުގެ ފަހުކޮޅުގައި ފޮނުވާނެ ކަމަށް ރަޝިޔާގެ އަލްމާޒް އެންޓޭޒް ކުންފުނިން ބުނެފިއެވެ. އަލްމާޒް އެންޓޭޒަކީ، ރަޝިޔާއިން މަދު ގައުމަކަށް ނޫނީ ވިއްކާފައި ނުވާ އެސް 400ގެ މިސައިލްގެ ދިފާއީ ނިޒާމު އުފައްދާ ކުންފުންޏެވެ.
ރަޝިޔާ ކުންފުނިން ބުނެފައި ވަނީ ދެފަރާތުގެ އެއްބަސްވުމުގައިވާ މުއްދަތުގައި އިންޑިއާއަށް މިނިޒާމު ފޮނުވާނެއެވެ.
އެސް 400އަށް އަހުލުވެރިކުރާ އިންޑިއާ ޓެކްނީޝަނުންގެ ފުރަތަމަ ޓީމުން ވަނީ ތަމްރީންތައް ނިންމާފައެވެ. މިހާރު ދެވަނަ ޓީމެއް ދަނީ ތަމްރީން ވަމުންނެވެ.
މިތަމްރީންގައި ބައިވެރިވާ އިންޑިއާގެ މީހުންގެ އަދަދު ކަނޑައެޅިގެން ދެންނެވުމަށް ރަޝިޔާ ކުންފުނިން އުޒުރުވެރި ވެއެވެ. ނަމަވެސް މީގައި ވަރަށް ގިނަ މީހުން ހިމެނޭކަމަށް ބުނެއެވެ.
2018ގެ އޮކްޓޯބަރުގައި އިންޑިއާއިން ވަނީ އެސް 400ގެ ފަސް ނިޒާމު ގަތުމަށް ރަޝިޔާއާއެކު ސޮއިކޮށްފައެވެ. މި ކޮންޓްރެކްޓްގެ ޖުމުލަ އަގަކީ، 5.43 ބިލިއަން އެމެރިކާ ޑޮލަރެވެ.
