ސްރީލަންކާގެ ކުރީގެ ޚާރިޖީ ވަޒިރު މަންގަލަ ސަމަރަވީރާ، ކޮވިޑްގެ އާލާސްކަންފުޅުގައި މިއަދު އަވަހާރަވެއްޖެއެވެ. އުމުރުން 65 އަހަރުގައި ސަމަރަވީރާ އަވަހާރަވީ ޕްރައިވެޓް ހަސްފަތާލެއްގައި ފަރުވާ ދެވެމުން ދަނިކޮށެވެ. އޭނާ އޮންނެވީ އައި ސީޔޫގައެވެ.
ސަމަރަވީރާއަށް ތަޢުޒިޔާ ވިދާޅުވަމުން ރައީސް އިބްރާހީމް މުޙައްމަދު ސާލިޙު ކުރެއްވި ޓުއީޓެއްގައި ވިދާޅުވީ ސަމަރަވީރާއަކީ ސްރީލަންކާއާއި ރާއްޖޭގެ ގުޅުން ބަދަހި ކުރެއްވުމަށް މަސައްކަތް ކުރެއްވި ބޭފުޅެއް ކަމުގައެވެ.
މިއީ ކޮވިޑް ވަބާގައި ސްރީލަންކާއިން ދެވަނައަށް ނިޔާވި އެންމެ މަތީ ސިޔާސީ މަސްއޫލުވެރިޔާއެވެ. ކުރިން ނިޔާވީ، ޕާލަމެންޓުގެ ކުރީގެ ރައީސް ޑަބްލިޔުޖޭއެމް ލޯކުބަންޑާރަ އެވެ.
ސަމަރަވީރާއަކީ ސިޔާސީ ދެބަސްވެރިން އެއްގަލަކަށް އެރުވުމުގެ މަސައްކަތުގައި މުހިންމު ކާމިޔާބީއެއް ހޯއްދަވައި، މަހިންދަ ރާޖާޕަކްސައަށް ވެރިކަން ގެއްލި ދިއުމުގައި އިސް ދައުރެއް އަދާކުރެއްވި ބޭފުޅެކެވެ.
