މިސައިލުން ދިފާއުވުމުގެ އައްޑަނަތައް ގަނެ، އަމިއްލައަށް މިސައިލްގެ ދިފާއީ ނިޒާމުތައް އުފައްދައި އިންޑިއާއިން ދަނީ މިސައިލުން ދިފާއުވުމުގެ ނިޒާމު ވަރުގަދަ ކުރަމުންނެވެ. ރަޝިޔާއިން އުފައްދާފައިވާ ދުނިޔޭގެ އެންމެ ތަރައްގީވެފައިވާ މިސައިލްގެ އައްޑަނަ އެސް 400 ގަތުމަށް އިންޑިއާއިން ނިންމާފައި ވަނީ މިދިފަދަ ދިފާއެއް ބިނާކުރުމަށްޓަކައެވެ.
އިންޑިއާއިން އަމިއްލައަށް އުފައްދާފައިވާ މިސައިލް އައްޑަނައިގެ ނިޒާމު ވަނީ އިންޑިއާގެ އިރުމަތީގައި އޮންނަ އަބްދުލް ކަލާމް ޖަޒީރާއިން ޓެސްޓް ކޮށްފައެވެ.
ބެލެސްޓިކް މިސައިލުން ދިފާއުވުމަށް އިންޑިއާއިން އަމިއްލައަށް އުފައްދާފައިވާ ދެ ދިފާއީ ނިޒާމެއް ގެންގުޅެއެވެ. ދެ ފިޔަވަހީގެ މައްޗަށް އެކުލެވޭ މި ޕްރޮގްރާމްގެ ތެރޭގައި ޕްރިތުވީ ޓެކްޓިކަލް ބެލެސްޓިކް މިސައިލްގެ ދިފާއީ ނިޒާމަކީ، ޖައްވުގެ ބޭރު ފަށަލައިން މިސައިލް އަތުލައިގަނެ، އޭގެ އަމާޒަށް ފޯރުމުގެ ކުރިން ހަލާކުކޮށްލާ ނިޒާމެކެވެ. ދެވަނަ ފިޔަވައްސަކީ، މިސައިލްގެ ވޯރހެޑް އޭގެ އަމާޒަށް ވާސިލުވުމުގެ ކުރިން ދުނިޔޭގެ ވައިގެ ފަށަލައިގެ ތެރޭގައި ހަލާކުކޮށްލާ ނިޒާމެކެވެ.
މި ނިޒާމު ތަޖުރިބާ ކުރުމުގެ ގޮތުން ކޮށްފައިވާ ޓެސްޓްތަކުގައި، 15އާއި 25 ކިލޯމީޓަރު މަތީގައި މިސައިލް އުޅެނިކޮށް ހޯދައިގަނެ، ހަލާކުކޮށްލާފައި ވެއެވެ.
އިންޑިއާއިން ބެލެސްޓިކް މިސައިލުން ދިފާއުވުމުގެ ނިޒާމުތައް ގާއިމް ކުރަމުންދާއިރު ޕާކިސްތާނުން ގެންގުޅެނީ އެހެން އުކުޅެކެވެ. ޕާކިސްތާނުން މަސައްކަތް ކުރަމުން ދަނީ ދިފާއަށް ވުރެން ބޮޑަށް ހަމަލަ ދިނުމުގެ ނިޒާމުތައް ވަރުގަދަކޮށް އުފެއްދުމަށެވެ. އެގޮތުން ނިއުކްލިއަރ ވޯހެޑްތައް އިތުރު ކުރުމާއި އެއް އާލާތަކުން އެއް ފަހަރާ ގިނަ މަސައިލްތައް ފޮނުވާލެވޭ ގޮތަށް ކުޅަދާނަކަން އިތުރު ކުރުން ހިމެނެއެވެ.
