ތާލިބާނުންނާ ދެކޮޅުވެރި އަފްޣާން މީހުން ދެކޭ ގޮތުގައި ތާލިބުންނަކީ، ހައްދުފަހަނައަޅާފައިވާ ޕުޝްތޫން މީހުންގެ ހަނގުރާމަވެރި ބައިގަނޑެކެވެ. ތާޖިކް ދަރިކޮޅުގެ މީހުންނާއި ހަޒާރާ ދަރިކޮޅުގެ މީހުންނަކީ ތާލިބާނުން ވެރިކަން ކުރިއިރުވެސް އެމީހުންނާ ދެކޮޅަށް ނިކުތް ބަޔެކެވެ. މީގެ އިތުރުން ބޯދާ ގަބީލާ ސަގާފަތެއް އޮންނަ އަފްޣާނިސްތާންގައި ދައުލަތާއި ސަރުކާރަށް ވަފާތެރިވުމަށް ވުރެން ބޮޑަށް މީހުންގެ ވަފާތެރިކަން އޮންނަނީ ގަބީލާއަށާއި ޚާންދާނަށެވެ. އެހެންވެ، ތާލިބާނާ ދެކޮޅަށް ގަބީލާ ހަނގުރާމަވެރިން ތެދުވާނެ ކަމަށް ލަފާ ކުރެވެއެވެ.
އަފްޣާނިސްތާނަށް އެތެރެއާއި ބޭރުން ދިމާވާން ހުރި ގޮންޖެހުންނަށް ކިތަންމެހާވެސް ގިނައެވެ. ނަމަވެސް ތާލިބާނުންގެ އައު ރަޙުމަތްތެރިޔާ، ޗައިނާއަކީ ތާލިބާނުންނަށްގެ ދަތިތައް ހައްލު ކޮށްދޭން މަސައްކަތް ކުރާނެ ގައުމެކެވެ. އެކަމަކު ބޮޑު އަގަކާ އެކުގައެވެ.
ނިއްކީ އޭޝިއާ ނޫހުގައި ނޭޓޯގެ 16 ވަނަ ސުޕްރީމް އެލައިޑް ކޮމާންޑަރ ޖޭމްސް ސްޓެވްރިޑިސް ލިޔުއްވި ގޮތުގއި ޗައިނާއަކީ ދުނިޔޭގެ ހައްސާސް މައުދަންތައް ކޮނެގެން ނެގުމާއި މައުދަންތައް ސާފުކުރުމާއި އެމައުދަނުން ސާމާނު އުފައްދައި ސަޕްލައި ކުރުމުގެ ހުރިހައި ކަމެއް އަމިއްލަ ކޮށްލައި މޮނޮޕޮލީއެއް އުފައްދަން މަސައްކަތް ކުރާ ގައުމެކެވެ.
މައިކްރޯ ޗިޕުން ފެށިގެން ކާރުގެ ބެޓެރިއާ ހަމައަށް ބޭނުންވާ ހުރހައި މާއްދާއެއް އަތްދަށު ލުމަކީ ދުނިޔެ ކޮންޓްރޯލު ކުރުމަށް ޗައިނާއިން ގެންގުޅޭ އައު ސްޓްރެޓެޖީއެވެ. އެހެންވެ، އަފްޣާނިސްތާންގެ ރޯ މައުދަންތައް ކޮނެގެން ނެގުމަށް ފުރުސދަތު ހޯދުމަށްޓަކައި ޗައިނާއިން އަފްޣާނިސްތާންގެ ތާލިބުންގެ ސަރުކާރު ބަލައި ގަންނާނެއެވެ.
ސްޓެވްރިޑިސް ލިޔުއްވިގޮތުގައި އަފްޣާނިސްތާންގެ ތާރީޚުން ދައްކަނީ ބޭރުން އަރައި ތިބޭ ބިދޭސިން ފައިބައިގެން ދާފަހުން އަފްޣާނިސްތާން މީހުން އެއްބަޔަކު އަނެއް ބަޔެއްގެ މެދުގައި ބިން ކޮންޓްރޯލު ކުރުމަށް ހަނގުރާމަ ކުރާ ތަނެވެ.
އޭނާ ވިދާޅުވާ ގޮތުގައި އަފްޣާނިސްތާންގެ ވެރިކަން ބަދަލުވުމުން އެންމެ އުފާކުރާނެ ގައުމަކީ ޕާކިސްތާނެވެ. ވިހި އަހަރު ވަންދެން ތާލިބާނަށް ޕާކިސްތާނުން ވަނީ ވާގިވެރިވެފައެވެ. މުގާބިލުގައި އިންޑިއާ އަފްޣާނިސްތާނުން ބޭރުގައި ބެހެއްޓުމަކީ ޕާކިސްތާނުން ތާލިބާން ގާތު އެދޭނެ އެންމެ ބޮޑު އެދުން ކަމުގައ އޭނާ ލިޔުއްވައެވެ. އަދި އަފްޣާނިސްތާނުން މައުދަންތައް ނެގުމުގައި ޕާކިސްތާނުން ޗައިނާއާ ބައިވެރިވާނެ ކަމަށްވެސް އޭނާ ލަފާ ކުރައްވައެވެ.
