އަފްޣާނިސްތާންގައި އެމެރިކާ ސިފައިން އެންގުޅުނު އެތައް މިލިއަން ޑޮލަރުގެ ހަތިޔާރު، ތާލިބާނުން ވަގަށް ބޭރު ކުރަމުންދާ ކަމަށް އިނގިރޭސިވިލާތުގެ މިރަރ ނޫހުން ރިޕޯޓް ކޮށްފިއެވެ. އެ ނޫހުން ބުނިގޮތުގައި އެމެރިކާ ސިފައިން ބޭނުން ކުރި ހަމްވީ އުޅަނދުތަކާއި އިތުރު އެހެން ސާމާނުތައްވެސް ޕާކިސްތާނަށް ބޭރުކުރަމުންދާ ތަންފެނިފައި ވެއެވެ. ފައިސާ ހޯދުމަށްޓަކައި ތާލިބާނުން މި ސާމާނތައް ޓެރަރިސްޓް ޖަމާއަތްތަކަށް ވިއްކާނެ ކަމަށް ނޫހުން ބުންޏެވެ.
ތާލިބާނުން މިތަކެތި ބޭރުކޮށްފައި ވަނީ ޕާކިސްތާންގެ ކުއެޓާ ސިޓީއަށެވެ. ކުއެޓާ ސިޓީއަކީ ތާލިބާނުން ޕާކިސްތާނުގައި ހަރަކާތްތެރިވާ އެމީހުންގެ މައި މަރުކަޒެވެ. ނޫހުން ބުނެފައިވާ ގޮތުގައި ޕާކިސްތާންގެ ޖާސޫސީ އިދާރާ އައިއެސްއައި އިން ވަނީ މިތަކެތި ޕާކިސްތާނަށް ވެއްދުމަށް ހުއްދަ ދީފައެވެ.
ކުއެޓާއަކީ އަފްޣާނިސްތާންގެ ކަންދަހާރުން ތިން ގަޑީގެ ދުރުމިނުގައި އޮންނަ ސިޓީއެކެވެ. މިއީ ގިނަ އަދަދަކަށް ހެރޮއިން އުފައްދައި ބޭރުކުރާ ސިޓީއެކެވެ.
ޕަޝްތޫން މީހުން ގިނަ ކުއެޓާ ސިޓީއަކީ ތާލިބާންގެ މަޝްވަރާ މަޖިލިސް އޮންނަ ސިޓީއެވެ.
