ތާލިބާނުން އަމިއްލައަށް އެކުލަވާލާ ސަރުކާރެއް ތާޖިކިސްތާނުން ގަބޫލު ނުކުރާނެ ކަމަށް އެގައުމުން ބުނެފިއެވެ. ތަޖިކިސްތާންގެ ރައީސް އިމާމް ރަޙްމާނޯވްއާއެކު ޕާކިސްތާންގެ ޚާރިޖީ ވަޒީރު ޝަހް މަޙްމޫދު ޤުރެއިޝީ ބޭއްވެވި ބައްދަލުވުމަށްފަހު ތާޖިކިސްތާނުން ބުނެފައި ވަނީ ތާލިބާނުން އެކުލަވާލާ ސަރުކާރެއްގައި ތާޖިކިސްތާންގެ ދަރިކޮޅުގެ މީހުންވެސް ހިމަނަންވާނެ ކަމަށެވެ.
ތާޖިކިސްތާނުން ބުނެފައި ވަނީ އަފްޣާނިސްތާންގެ އާބާދީގެ 46 އިންސައްތައަކީ ތާޖިކް ދަރިކޮޅުގެ މީހުން ކަމަށެވެ. އެހެންވެ އެއްވެސް ސަރުކާރެއް އެކުލަވާލާނަމަ އެ ސަރުކާރެއްގައި ތާޖިކް ދަރިކޮޅުގެ މީހުން ހިމަނަން ވާނެ ކަމަށެވެ.
އަފްޣާނިސްތާންގައި އެންމެ ފަހުން ބޯހިމެނުމެއް ބާއްވާފައި ވަނީ 1979ގައެވެ. އެއަށްފަހު 2013ގައި ބޯ ހިމަނަން އުޅުމުން ސުއާލު ކަރުދާހުގައި ހައްސާސް ސުއާލުތަކެއް ހުރިކަމަށް ބުނެ އެ ބޯހިމެނުން ފުރިހަމަ ކުރެވޭ ގޮތެއް ނުވިއެވެ.
އަފްޣާނިސްތާނަކީ ގަބީލާތަކެއްގެ މައްޗަށް ހިމެނޭ މުޖުތަމައެއްކަމުން ގައުމިއްޔަތުގެ ސިފަ އެގައުމުގައި އަށަގެންފައެއް ނުވެއެވެ.
ބައެއް ފަރާތްތަކުން ލަފާ ކުރާ ގޮތުގައި އެންމެ ބައިގިނަ ޕުޝްތޫ ދަރިކޮޅުގެ މީހުން ފިޔަވައި ދެން އެންމެ ގިނަ ވާނީ ތާޖިކް މީހުންނެވެ. ނަމަވެސް އެމީހުންގެ އަދަދު 25 އިންސައްތައަށް ވުރެން އިތުރެއް ނުވާނެ ކަމަށް ބުނެއެވެ.
އަފްޣާނިސްތާން ލޫޓުވާލަން އެރި ރޫސީންނާއި ފަހުން ޕުޝްތޫ ތާލިބުންނާ ދެކޮޅަށް އެންމެ ގަދައަށް ހަނގުރާމަ ކުރި ބަޔަކީ ތާޖިކް ދަރިކޮޅުގެ މީހުންނެވެ. ޕަންޖްޝޭރް ވާދީގައި އަޙުމަދު ޝާހް މަސްއޫދުގެ ނޯދަން އެލައެންސްއިން ތާލިބާނާ ދެކޮޅަށް ކުރި ހޯދިއެވެ. އަޙްމަދު ޝާހް މަސްއޫދުގެ ދަރިފުޅު އަޙުމަދު މަސްއޫދު މިހާރުވެސް ގެންދަނީ ތާލިބާނާ ދެކޮޅަށް ލަޝްކަރެއް އެކުލަވާލަމުންނެވެ. ޕަންޖްޝޭރް ވާދީއަކީ ތާލިބާނުންގެ އަތްދަށަށް ގޮސްފައިވާ ސަހަރެއް ނޫނެވެ.
