އިންސާނީ ހައްގުތަކާ ބެހޭ އދގެ ކޮމިޝަން އިން އަފްޣާނިސްތާނާ ބެހޭ ޚާއްސަ ބައްދަލުވުމެއް ބާއްވައިފިއެވެ. މި ބައްދަލުވުމުގައި އިނގިރޭސިވިލާތުން ބުނެފައި ވަނީ އިންސާނީ ހައްގުގެ މައްސަލާގައި، އަފްޣާނިސްތާންގެ ތާލިބާނުން ބައިނަލްއަގްވާމީ މުޖުތަމައިން ޒިންމާކުރުވާނެކަން އެމީހުން ދަންނަން ވާނެ ކަމަށެވެ.
ޔޫކޭގެ ފަރާތުން މި ބައްދަލުވުމުގައި ވާހަކަ ދެއްކެވީ ޔޫކޭގެ ހިއުމަން ރައިޓްސް، ސައުތު އޭޝިއާ އެންޑް ދަ ކޮމަންވެލްތު މިނިސްޓަރ ލޯރޑް ތާރިޤް އަޙުމަދުއެވެ.
އޭނާ ފާހަގަ ކުރެއްވިގޮތުގައި ބައިނަލްއަގްވާމީ މުޖުތަމައިން އަފްޣާނިސްތާންގައި ކުރަން ހުރި މަސައްކަތްތައް ކިތަންމެހާވެސް ގިނައެވެ. ތާލިބާނުންގެ އަތްދަށުން އަންހެނުންނަށް ސަލާމަތެއް ނެތް ކަމަށް ނޫސްވެރިން ބުނެއެވެ. އަދި އަންހެނުންނާ ފިރިހެނުން ވަކި ކުރުމަށް ތާލިބާނުން މަސައްކަތް ކުރެއެވެ.
ތާލިބާނުންގެ ފުށުން ނުރައްކާ ފޯރާ ބަޔަކީ އަންހެނުންނާއި ނޫސްވެރިންނެވެ.
