ތާލިބާނުންގެ ފުށުން އިންސާނީ ހައްގަށް ނުރައްކާ ވަމުންދާ ކަމަށާއި ތާލިބާނުން ހިންގާފައިވާ ޖަރީމާތަކުގެ މަޢުލޫމާތު އެބަހުރި ކަމަށް އިންސާނީ ހައްގުތަކާ ބެހޭ އދގެ ކައުންސިލްގެ ރައީސާ ހާމަކުރައްވައިފިއެވެ. އަފްޣާނިސްތާންގެ މައްސަލާގައި ބާއްވާފައިވާ ޚާއްސަ މަޝްވަރާތަކުގައި އޭނާ ވިދާޅުވީ ތާލިބާނުން މީހުން ދަންޖައްސާފައިވާ ކަމުގެ މަޢުލޫމާތުވެސް ލިބިފައިވާ ކަމުގައެވެ.
ޔޫއެން ހައިކޮމިޝަނަރ ފޯރ ހިއުމަން ރައިޓްސް މިޝޭލް ބެކްލެޓް، ވިދާޅުވީ، މީހުން ދަންޖެއްސުމާއި އަންހެން ކުދިންނާއި އަންހެނުންނަށް މިނިވަން ކަމާއެކު އުޅުމުގެ ހައްގަށް ހުރަސްއެޅުމާއި، އަންހެން ކުދިންގެ އުނގެނުމުގެ ހައްގަށް ހުރަސް އެޅުމާއި ކުޑަ ކުދިން ހަނގުރާމަވެރިންގެ ގޮތުގައި ބޭނުންކުރުމާއި މީހުންގެ އެއްވުމުގެ ހައްގަށް ހުރަސްއެޅުމާއި މީހުންގެ މިނިވަންކަން ފިއްތުމަށް މަސައްކަތް ކުރުމުގެ ޝަކުވާތައް ލިބިފައިވާ ކަމަށެވެ.
ބެކްލެޓް މިމައްސަލަތަކުގެ ތަފްސީލެއް ނުދެއްވައެވެ. މިވާހަކަތައް އޭނާ ހާމަކުރައްވާފައި ވަނީ ހިއުމަން ރައިޓްސް ކައުންސިލްގެ 31 ވަނަ ޚާއްސަ ޖަލްސާގައެވެ.
އޭނާ ވިދާޅުވިގޮތުގައި ތާލިބާނުން ހުރަސްކުރާނެ ރަތް ރޮނގަކީ ބައިނަލްއަގްވާމީ މުއާހަދާތަކުން ކަނޑައަޅާފައިވާ ގޮތާ ޚިލާފަށް، އަންހެނުންނަށް ވަޒީފާ އަދާ ކުރުމަށް ހުރަސް އެޅުމާއި އަންހެން ކުދިން އުނގެނުމުން މަހުރޫމް ކުރުމާއި އަންހެނުންގެ ހައްގަށް ހުރަސް އެޅުމަށް މަސައްކަތް ކުރުމެވެ.
