ތާލިބާނުންނަކީ އަންހެނުންނަށް އޯގާތެރި ބަޔެއް ނޫން ކަމަށް ބުނެ ތާލިބާން ހަނގުރާމަވެރިންނާ ވައިނޭޅުމަށް ތާލިބާންގެ ތަރުޖަމާން، އަންހެނުންނަށް، ނަސޭހަތްތެރި ވެއްޖެއެވެ. ސީއެންއެންއާ ވާހަކަ ދައްކަމުން ޒަބީހުﷲ މުޖާހިދު ބުނެފައި ވަނީ ތާލިބާން މީހުންނަކީ އަންހުން ގެންގުޅެން އެނގޭ ބަޔެއް ނޫން ކަމަށެވެ. އެހެންވެ، އަންހެނުންނަށް އެންމެ ހެޔޮވެގެންވަނީ އެމީހުން ގެއިން ނުނިކުމެ، ގޭގައި ތިބެގެން މަސައްކަތް ކުރުމެވެ.
ޒަބީޙުﷲ މުޖާހިދުގެ ސަރީޙަ އިބާރާތަކީ، ތާލިބާނުން މެދުމިނުގެ ބަޔަކަށް ބަދަލުވެފައިވާ ކަމަށް ދައްކަން ކުރާ މަސައްކަތަށް ލިބިގެން ދިޔަ ބޮޑު ގެއްލުމެވެ.
އަންހެނުންނާއި ކުޑަ ކުދިންނާ މެދު މުއާމަލާތު ކުރާ ގޮތާމެދު ނުތަނަވަސްވާކަމަށް ބުނެ، ވަރލްޑް ބޭންކުން ވަނީ އަފްޣާނިސްތާނަށް ދޭ ފައިސާ ދިނުން ހުއްޓާލި ކަމަށް އަންގާފައެވެ. އދންވެސް ވަނީ ތާލިބާނުން އަފްޣާނިސްތާން އަތުލައިގަތުމުން އިންސާނީ ހައްގަށް އަރައިގެންފައިވާ ކަމަށް ބުނާ ރިޕޯޓްތައް ދެފުށް ފެންނަ ގޮތަކަށް ތަހުގީގު ކުރަން ޖެހޭނެ ކަމަށް ބުނެފައެވެ.
ތާލިބާނުން ހިފި ސަރަހައްދުތަކުގައި އަންހެނުން ގޭގައި ތިބުމަށް ވަނީ މަޖުބޫރު ކޮށްފައެވެ. ކާބުލްއާއި ބޮޑެތި ސިޓީތަކުގައި ހަރުކޮށްފައިވާ އަންހެނުންގެ ޕޯސްޓަރު އިޝްތިހާރުތަކުގައި ވަނީ ކުލަ އުނގުޅައި ސިފަ ހުތުރުކޮށްފައެވެ.
ތާލިބާނުން 1996ގައި ވެރިކަން ކުރިއިރު އެމީހުންގެ ފަތުވާއާ ޚިލާފްވާ އަންހެނުން މަގުމަތިން ދަމައި ކޫއްތައި ތަޅައި ހަދާފައި ވެއެވެ.
ތާލިބާނުން އާޔަތްތަކާއި ހަދީސްތައް މާނަކުރަނީ ހަނިގޮތަކަށެވެ. ތާލިބާނުގެ ލީޑަރު މުއްލާ އުމަރު ބުނިގޮތުގައި ކާފަރުންނާ އަތާ އަތްޖޯޑުކޮށް ސަލާން ކުރުން ހެވެއް ނުވާނެއެވެ. ކާފަރުންނަކީ ނަޖިސް ބަޔެކެވެ! އޭނާ ބުންޏެވެ.
