އިންޑިއާގެ ރަހްމަތްތެރި ހަތަރު ގައުމުން ބައިވެރިވެގެން ބާއްވާ މަލާބާރު އަސްކަރީ ތަމްރީންތައް ގުއާމްގައި އިއްޔެ ފަށައިފިއެވެ. މި ތަމްރީންތަކަކީ، އިންޑިއާއާއި އެމެރިކާއާއި ޖަޕާނާއި އޮސްޓްރޭލިއާއިން ބައިވެރިވާ ތަމްރީންތަކެކެވެ.
މި ހަތަރު ގައުމަކީ، އިންޑިއާ ކަނޑާއި ޕެސިފިކް ކަނޑު ހުޅުވާފައި ބޭއްވުމަށް ބާރުއަޅާ އިސް ހަތަރު ގައުމެވެ.
އެމެރިކާއާއި އިންޑިއާ ގުޅިގެން 1992ގައި ފެށި މިއަސްކަރީ ތަމްރީންތަކަކީ މިހަތަރު ގައުމުގެ ސިފައިންގެ އޮޕަރޭޝަންތަކާއި ކޮމާންޑްތައް އެއްގޮތް ކުރުމަށް ބާއްވާ ތަމްރީންތަކެކެވެ.
މި ތަމްރީންތަކުގައި އިންޑިއާގެ މަތިންދާ ބޯޓު އުފުލާ މަނަވަރު ވިކްރަމަދީތިޔައާއި އެމެރިކާގެ މަތިންދާބޯޓު އުފުލާ މަނަވަރު ނިމިޓްޒްވެސް ބައިވެރިވެއެވެ. މީގެ އިތުރުން ހުރިހައި ގައުމަކުންވެސް މަތިންދާބޯޓާއި ހެލިކޮޕްޓަރާއި މަނަވަރުތައްވެސް ބައިވެރިކޮށްފައި ވެއެވެ.
މަތިންދާ ބޯޓު އުފުލާ މަނަވަރުތަކުން އެކިގައުމުތަކުގެ ބޯޓުތައް އުދުއްސުމާއި ޖެއްސުމުގެ އުކުޅުތަކަށް ހޭނުމާއި ކޮމާންޑްތައް އެއްގޮތް ކުރުން މިތަމްރީންތަކުގައި ހިމެނެއެވެ. މީގ އިތުރުން ހަތިޔާރު ބޭނުން ކުރުމާއި ކަނޑުގެ ސަތަހައަށް އަމާޒު ކުރުމާއި ސެބްމެރިންތަކަށް ޙަމަލަ ދިނުމުގެ އުކުޅުތަކަށް ހޭނުންވެސް ހިމެނެއެވެ.
އިންޑިއާގެ ކަނޑުގެ ސިފައިން ބުނެފައިވާ ގޮތުގައި މިއަހަރަކީ މީގެ ކުރީ ތަމްރީންތަކުގައި ބޭނުން ކޮށްފައި ނުވާ އުނދަގޫ އުކުޅުތައް ބޭނުން ކުރާނެ އަހަރެކެވެ.
