ދުނިޔޭގައި މިވަގުތު އޮތް އެންމެ ނުރައްކާތެރި އަދި އެންމެ ބާރުގަދަ ޓެރަރިސްޓް ޖަމާއަތަކީ ތާލިބާން ޖަމާއަތެވެ. އޭޝިއާ ޓައިމްސްއިން ލަފާކުރާ ގޮތުން އެމެރިކާއާއި ނޭޓޯ ސިފައިން ގެންގުޅުނު ހަތިޔާރު ގުދަން ވަނީ ތާލިބާނުންގެ އަތްމައްޗަށް އަރާފައެވެ.
މި ހަތިޔާރުގެ އަގު 230 މިލިއަން އެމެރިކާ ޑޮލަރަށް އަރާނެކަމަށް ލަފާ ކުރެވެއެވެ. މީގެ ތެރޭގައި ބަރުހަތިޔާރާއި އުޅަނދާއި ޑްރޯނާއި ހެލިކޮޕްޓަރު ހިމެނެއެވެ. އަދި އަފްޣާނިސްތާން ސިފައިންނަށް ދީފައިވާ އިތުރު 19 މިލިއަން ޑޮލަރުގެ ސާމާޏުވެސް ވަނީ ތާލިބާންގެ އަތުޖެހިފައެވެ.
މީގެ އިތުރުން ރަޝިޔާ ސިފައިން އަތުން އަފްޣާނިސްތާނަށް ލިބުނު ހެލިކޮޕްޓަރުތައްވެސް ވަނީ ތާލިބާންގެ އަތު ޖެހިފައެވެ. ތާލިބާންގެ ހަނގުރާމަވެރިން ވަނީ ބްލެކްހޯކް ހެލިކޮޕްޓަރުތަކާއި ބްރަޒީލްގައި އުފައްދާފައިވާ އޭއެން29 ހެލިކޮޕްޓަރުތައް ކުރިމަތީގައި ތިބެގެން ފޯޓޯނަގައި މީސްމީޑިއާއަށް ލާފައެވެ.
އޭޝިއާ ޓައިމްސްއިން ބުނާ ގޮތުގައި އަފްޣާނިސްތާން މަސްރަހު ދިރާސާ ކުރާ ފަރާތްތަކުގެ ނުތަނަވަސް ކަމަކީ، ތާލިބާނުން ބައިނަލްއަގްވާމީ ކަޅު ބާޒާރުގައި މިތަކެތި ވިއްކާލަން އުޅެދާނެ ކަމުގެ ބިރެވެ. މިއިން ނިކުންނާނެ ނަތީޖާއެއް ކަމަށްވަނީ ޓެރަރިސްޓް ހަރަކާތްތައް އިތުރު ވުމާއި ލީބިޔާގައި ފެށިގެން ދިޔަފަދަ އަހުލީ ހަނގުރާމައެއް ފެށުމާއި އެފްރިކާގެ ސާހިލް ސަރަހައްދުގައި ޓެރަރިސްޓުންގެ ހަމަލަތައް އިތުރުވެގެން ދިޔަފަދަ ގޮތަކަށް އެހެން ތަނެއްގައި މިތަކެތި ބޭނުންކޮށްގެން ޓެރަރިޒަމް އާލާ ވުމެވެ.
ތާލިބާންގެ ކާމިޔާބީއަށް އިސްލާމީ ޓެރަރިސްޓް ޖަމާއަތްތަކުން ވަނީ އުފާ ފާޅުކޮށްފައެވެ. އަދި މި ޖަމާއަތްތަކުން ވަނީ ތާލިބާންގެ ކޮޕީ ކުރުމަށް އެހެން ފަރާތްތަކަށްވެސް ގޮވާލާފައެވެ.
ތާލިބާނަކީ އެމީހުންގެ އިސް ސަފުގައި ދުނިޔޭގައި ލިސްޓް ކުރެވިފައިވާ އެންމެ ބޮދެތި ޓެރަރިސްޓުން ހަރަކާތްތެރިވާ ޖަމާއަތެކެވެ. ޓެރަރިސްޓް ޖަމާއަތް ކަމުގައިވާ ހައްގާނީ ނެޓްވަރކްގެ އެންމެ އުޅެނީ ތާލިބާންގެ އެންމެ ކުރީ ސަފުގައެވެ.
ލަޝްކަރޭ ތޮއްޔިބާއާއި ޖައިޝޭ މުހައްމަދު އަދި އަލްގައިދާއަކީވެސް ތާލިބާނާ ގުޅިފައިވާ މީހުންނެވެ. ތާލިބާނުން ކާބުލް ހިފުމަށްފަހު ކުރި އެންމެ ފުރަތަމަ ކަމަކީ، ކާބުލްގެ ޖަލުގައި ތިބި އަލްގައިދާއާއި އައިސިސްގެ މީހުން މިނިވަން ކުރުމެވެ.
އަލްގައިދާ ލީޑަރުންނަކީ އަފްޣާނިސްތާންގައި ދިރިއުޅޭ މީހުންނެވެ. އަލްގައިދާގެ ލީދަރު އައިމަން ޒަވާހިރީ ވަނީ 2016ގައި ތާލިބާންގެ ލީޑަރުކަމަށް ހައިބަތުﷲ އަޚުންޒާއަށް ބައިއަތު ހިފައި އެކަން އިޢުލާން ކޮށްފައެވެ.
