ކާބުލްގައި ތާލިބާނުން ވެރިކަން ހިފިފަހުން މެދުތެރޭ އޭޝިއާގެ ގައުމުތަކުން ހަތިޔާރު ގަތުމަށް ރަޝިއާއަށް ގިނަ އޯޑަރުތަކެއް ލިބިފައިވާ ކަމަށް މޮސްކޯއިން ބުނެއެވެ. ރަޝިޔާގެ ސަރުކާރުގެ ހަތިޔާރު ވިއްކާ ކުންފުނި ރޯސޯބޯރޮން އެކްސްޕޯޓުން ބުނިގޮތުގައި މެދުތެރޭ އޭޝިއާޣެ ގައުމުތަކުން އެދިފައި ވަނީ ހެލިކޮޕްޓަރާއި ހަތިޔާރާއި ސަރަހައްދު ބަލަހައްޓާ ނިޒާމުތައް ގަތުމަށެވެ. އަދި މި ގައުމުތަކަށް މިހަތިޔާރުތައް ވިއްކުމަށް ރަޝިޔާއިން މަސައްކަތް ކުރަމުންދާ ކަމަށްވެސް ބުންޏެވެ.
ކާބުލްގައި ސަރުކާރު ބަދަލު ވުމާ ގުޅިގެން ހަނގުރާމަވެރިންނާއި ޓެރަރިސްޓުން އަފްޣާނިސްތާނާ އަވަށްޓެރި ގައުމުތަކަށް އެތެރެ ވެދާނެ ކަމުގެ އިންޒާރު ރަޝިޔާއިން ވަނީ ދީފައެވެ.
ކާބުލް ހިފުމާ ގުޅިގެން ރަޝިޔާއިން ވަނީ އުޒުބެކިސްތާނާއި ތަޖިކިސްތާނާއެކު މިމަހު އަސްކަރީ ތަމްރީންތައް ބާއްވާފައެވެ.
ކުރިން ރޫސީވިލާތުގެ ފަލަކުގައި އެނބުރުނު އަފްޣާނިސްތާނާ އިންވެގެންވާ ގައުމުތައް ހިމެނޭ ސީޓޯ ޖަމުއިއްޔާގެ މެމްބަރުން ވަނީ އަންނަ މަހުގެ 7ން 9ށް އަސްކަރީ ތަމްރީންތައް ބޭއްވުމަށް ނިންމާފައެވެ.
