ދިވެހީން ބޭސްފަރުވާއަށް އިންޑިއާއަށް ދިއުމަށް ކުރިމަތިވަަމުންދާ ތަކުލީފުތައް އެނގިވަޑައިގަންނަވާ ކަމަށް ރާއްޖޭގެ ފޮރިން މިނިސްޓަރ ޢަބްދުﷲ ޝާހިދު ވިދާޅުވެއްޖެއެވެ. އެކަން ހައްލު ކުރެއްވުމަށް އެމަނިކުފާނު ގެންދަވަނީ މަސައްކަތް ކުރައްވަމުން ކަމަށް ވެސް ވިދާޅުވިއެވެ.
"ބޭސް ފަރުވާ ކުރުމަށް އިންޑިއާއަށް ދާން ބޭނުންވާ ދިވެހިންނަށް ވިސާ ހޯދުމުގައި ކުރިމަތިވަމުންދާ ތަކުލީފުތައް އަޅުގަނޑަށް އެނގޭ. މިހާތަނަށްވެސް އިންޑިއާގެ ބޯޑަރު ބަންދުކޮށްފައިއޮތުމުން، ދިވެހިންނަށް ވިސާދެމުން އައީ އިންޑިއާ ސަރުކާރުން ހަމަޖައްސާފައިވާ ޚާއްސަ އުސޫލެއްގެ ދަށުން،" އެމަނިކުފާނު ވިދާޅުވެފައިވެއެވެ.
މިނިސްޓަރ ވިދާޅުވީ އިންޑިއާ ވިސާ ހޯދުމަށް ދިވެހީންނަށް މިހާރު ކުރިމަތިވެފައިވާ އުނދަގޫތަކަށް ހައްލެއް ހޯދުމަށް އެމަނިކުފާނު ވަޑައިގަންނަވަނީ މެދުކެނޑުމެއްނެތި އިންޑިއާ ސަރުކާރާ ވާހަކަ ދައްކަވަމުން ކަމަށެވެ. "އަޅުގަނޑު މި އަންނަނީ މެދުކެނޑުމެއްނެތި އިންޑިއާ ސަރުކާރާ ވާހަކަދައްކަމުން. ވަރަށް އަވަހަށް ހައްލެއް ލިބޭނެކަމަށް ޔަޤީން ކުރަން،" މިނިސްޓަރ ވިދާޅުވިއެވެ.
އިންޑިއާދާން ވިސާ ހޯދުމަށް ދަތިވެ އެތައް ބަޔަކަށް މިހާރުވެސް ނުފުރިފައި އެބަތިއްބެވެ. އެފަދަ މީހުން މަސައްކަތްކުރަމުން ގެންދަނީ ދާއިރާގެ މެމްބަރު ނުވަތަ އެފަދަ އެހެެން ބޭފުޅަކު މެދުވެރިކޮށްގެން ވެސް އެކަން ހަމަޖެއްސޭތޯއެވެ.
