މަތީ ތައުލީމު ހާސިލް ކުރުމަށް މިއަހަރު ތެރޭގައި 720 ލޯނު ފުރުސަތު ހުޅުވާލާނެ ކަމަށް ރައިސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.
ރައީސް މިހެން ވިދާޅުވީ މިއަދު އިއްވެވި ރިޔާސީ ބަޔާނުގައެވެ.
އެމަނިކުފާނު ވިދާޅުވީ އަންނަ މޭ މަހުން ފެށިގެން ތައުލީމީ ދާއިރާގެ ހުރިހާ މުވައްޒަފުންގެ މުސާރަ ބޮޑުކުރަން ނިންމާފައިވާ ކަމަށެވެ. އަދި އިސްލާމްދީނާ އިސްތިޤުލާލަށް ބުރުލެއް އައުމަށް ސަރުކާރުން ކުޑަނަމަވެސް ފުރުސަތެއް ނުދެއްވާނެ ކަމަށެވެ.
މީގެ އިތުރުން ރައީސް ނަޝީދަށް ދެވުނު ހަމަލާއިން ސާބިތުވަނީ މުޖްތަމައުގައި ހަރުކަށި ފިކުރު މޫލާފައިވާ މިންވަރު ކަމަށާއި ރައްޔިތުންނަށްޓަކައި މަނިކުފާނު ކުރެއްވި މަސައްކަތްޕުޅަކީ މިސާލެއް ކަމަށާއި މާތް اللهގެ އޯގާވަންތަކަމާ ރަހްމަތްފުޅުން އެ މަނިކުފާނުގެ ފުރާނަފުޅު ސަލާމަތްވުމަކީ ރާއްޖޭގެ ޑިމޮކްރަސީ އަށް ލިބުނު އިތުރު ދިރުމެއް ކަމަށް ވެސް ރައީސް ވިދާޅުވިއެވެ.
"ރާއްޖޭގެ އިންސާނީ ހައްޤުތައް ދިރުވާ އާލާކުރުމަށް ލިބުނު އިތުރު ހަކަތައެއް. އެނުރައްކާތެރި ހަމަލާގެ ކުށާއެކުއެކީބޮޑު އެހެން ކަމެއް ސާބިތުވެގެން ހިނގައްޖެ. އެއީ މުޖްތަމަޢުގެ ތެރެއަށް ހަރުކަށި ފިކުރު މޫލާފައިވާ ފުންމިން." ރައީސް ވިދާޅުވިއެވެ.
ރައީސް ސާލިހު އިތުރަށް ވިދާޅުވީ ދީނުގެ ނަމުގާ ހިންގާ ނުރައްކާތެރި އަދި އަނިޔާވެރި ޢަމަލުތައް ކަމަށާއި އެނގި ހާމަވީ އެފަދަ ޢަމަލުތައް ހުއްޓުވުމަށް ކުރަންޖެހޭ މަސައްކަތުގެ ބޮޑުކަމާ ބުރަކަން ކަމަށެވެ.
